Fall of Troy
Quintus Smyrnaeus
Quintus Smyrnaeus. Fall of Troy. Way, Arthur S., editor. London: W. Heinemann; New York: The Macmillan Co., 1913.
- ἠδὲ περὶ κροτάφοισιν ἐπισταμένως ἐς Ἄρηα
- εὖ θέσθαι πήληκα καὶ ἐν παλάμῃ δόρυ πῆλαι
- καὶ χαλκὸν δηΐοισι περὶ στέρνοισι δαΐξαι
- ἰοῖσίν γʼ ἀπάνευθεν ἀπεσσύμενος πολεμίζει· [*](Zimmermann, for e)pessu/menos polemi/zein of MSS.)
- εἰ γάρ σευ κατέναντα τότʼ ἤλυθεν, ὅς σʼ ἔβαλέν περ,
- οὐκ ἄν ἀνουτητί γε τεοῦ φύγεν ἔγχεος ὁρμήν·
- ἀλλὰ Ζεὺς τάχα που τάδε μήδετο πάντʼ ἀπολέσσαι,
- ἡμέων δʼ ἐν καμάτοισιν ἐτώσια ἔργα τίθησιν·
- ἤδη γὰρ Τρώεσσι κατʼ Ἀργείων τάχα νίκην
- νεύσει, ἐπεὶ τόσσον περ Ἀχαιῶν ἕρκος ἀπηύρα.
- ὦ πόποι, ὡς ἄρα πάγχυ γέρων ἐν δώμασι Πηλεύς
- ὀχθήσει μέγα πένθος ἀτερπέϊ γήραϊ κύρσας·
- αὐτὴ μὲν φήμη [*](Zimmermann, for au)th=| su\n fh/mh|, sith lacuna, of Koechly.) μιν ἀπορραίσει τάχα θυμόν·
- ὧδε δέ οἱ καὶ ἄμεινον ὀϊζύος αἶψα λαθέσθαι·
- εἰ δέ κεν οὐ φθίσῃ ἑ κακὴ περὶ υἱέος ὄσσα,
- ἆ δειλὸς χαλεποῖς ἐνὶ πένθεσι γῆρας ἰάψει
- αἰὲν ἐπʼ ἐσχαρόφιν βίοτον κατέδων ὀδύνῃσι,
- Πηλεύς, ὃς μακάρεσσι φίλος περιώσιον ἦεν·
- ἀλλʼ οὐ πάντα τελοῦσι θεοὶ μογεροῖσι βροτοῖσιν.
- ὣς ὁ μὲν ἀσχαλόων ὀλοφύρετο Πηλείωνα.