Christus Patiens [Dub.] (Fort. Auctore Constantino Manasse)
Gregory, of Nazianzus
Gregorius Nazianzenus, Christus Patiens, Brambs, Teubner, 1885
- ποδῶν δὲ σῶν ἄμμιν δὸς ἅψασθαι φόβῳ ·
- τοὺς γὰρ ἐπ’ οὐδας νῦν κυνοῦσαι πίτνομεν,
- καταπλαγεῖσαι τῇ χαρᾷ καὶ τῷ φόβῳ.
- Μὴ δὴ φοβεῖσθε, μηδ’ ὑμῖν ἔστω φόβος.
- Ἄπιτε δ’, ἀγγείλατ’ ἀδελφοῖς μου τάχει
- ἐς Γαλιλαίαν ἀφικέσθαι, καί μέ πως
- ἐκεῖσε κατίδωσιν, ὡς ἔφην σφίσιν.
- Ὠ φαιδρότης ἄρρητός ἡλίου βολῆς,
- ὡς ἀνέτειλε χαρίεσσα νῦν ἕως·
- ὠ λαμπρότης ἄφατος αὐγῆς ἀκτίνων,
- ὠ χάρμα παγκόσμιον, ὦ θυμηδία,
- ὠ τέρψις εὐφρόσυνος, ὦ γῆθος μέγα,
- πῶς ἄν τις εἴπῃ, πῶς ἀπαγγείλῃ λόγῳ
- ἐμῆς ἀγαλλίαμα τανῦν καρδίας;
- Ἀλλ’ ἀπίωμεν, ὡς ὁ Δεσπότης ἔφη.
- Ἐγγὺς ἰδοὺ, δέσποινα, φίλαι σοι κόραι
- ἄλλαι τε πᾶσαι Γαλιλαίας θρεμμάτων
- πρὸς τὸν τάφον τρέχουσι μυρίσαι νέκυν,
- τὴν ἐξέγερσιν ἀγνοοῦσαι τοῦδ’ ἔτι.
- Οὐκοῦν σὺν αὐταῖς βῶμεν αὖθις ἐς τάφον·