Eumenides

Aeschylus

Aeschyli Tragoediae. Sidgwick, Arthur, editor. Oxford: Clarendon Press, 1902.

  1. αὐτῷ μελέσθω Λοξίᾳ μεγασθενεῖ.
  2. ἰατρόμαντις δ᾽ ἐστὶ καὶ τερασκόπος
  3. καὶ τοῖσιν ἄλλοις δωμάτων καθάρσιος.
Ἀπολλων
  1. οὔτοι προδώσω: διὰ τέλους δέ σοι φύλαξ
  2. ἐγγὺς παρεστὼς καὶ πρόσω δ᾽ ἀποστατῶν
  3. ἐχθροῖσι τοῖς σοῖς οὐ γενήσομαι πέπων.
  4. καὶ νῦν ἁλούσας τάσδε τὰς μάργους ὁρᾷς:
  5. ὕπνῳ πεσοῦσαι[*](πεσοῦσαι] fortasse παρεῖνται Wecklein) δ᾽ αἱ κατάπτυστοι κόραι,
  6. γραῖαι παλαιαὶ παῖδες, αἷς οὐ μίγνυται
  7. θεῶν τις οὐδ᾽ ἄνθρωπος οὐδὲ θήρ ποτε:
  8. κακῶν δ᾽ ἕκατι κἀγένοντ᾽, ἐπεὶ κακὸν
  9. σκότον νέμονται Τάρταρόν θ᾽ ὑπὸ χθονός,
  10. μισήματ᾽ ἀνδρῶν καὶ θεῶν Ὀλυμπίων.
  11. ὅμως δὲ φεῦγε μηδὲ μαλθακὸς γένῃ.
  12. ἐλῶσι γάρ σε καὶ δι᾽ ἠπείρου μακρᾶς
  13. †βιβῶντ᾽ ἀν᾽[*](βιβῶντ᾽ ἀν᾽ Stephanus: βεβῶντ᾽ ἂν M totum versum secludit Bothe, fortasse recte) ἀεὶ† τὴν πλανοστιβῆ χθόνα
  14. ὑπέρ τε πόντον[*](πόντον Turnebus: πόντου codd.) καὶ περιρρύτας πόλεις.
  15. καὶ μὴ πρόκαμνε τόνδε βουκολούμενος
  16. πόνον: μολὼν δὲ Παλλάδος[*](παλλάδος ad finem v. traiectum M, restituendum indicat (A et B suprascr.) m) ποτὶ πτόλιν
  17. ἵζου παλαιὸν ἄγκαθεν λαβὼν βρέτας.