Eumenides
Aeschylus
Aeschyli Tragoediae. Sidgwick, Arthur, editor. Oxford: Clarendon Press, 1902.
- τὴν μητέρ᾽ εἰπὲ πρῶτον εἰ κατέκτονας.
- ἔκτεινα: τούτου δ᾽ οὔτις ἄρνησις πέλει.
- ἓν μὲν τόδ᾽ ἤδη τῶν τριῶν παλαισμάτων.
- οὐ κειμένῳ πω τόνδε κομπάζεις λόγον.
- εἰπεῖν γε μέντοι δεῖ σ᾽ ὅπως κατέκτανες.
- λέγω: ξιφουλκῷ χειρὶ πρὸς δέρην τεμών.
- πρὸς τοῦ δ᾽ ἐπείσθης καὶ τίνος βουλεύμασι;
- τοῖς τοῦδε θεσφάτοισι: μαρτυρεῖ δέ μοι.
- ὁ μάντις ἐξηγεῖτό σοι μητροκτονεῖν;
- καὶ δεῦρό γ᾽ ἀεὶ τὴν τύχην οὐ μέμφομαι.
- ἀλλ᾽ εἴ σε μάρψει ψῆφος, ἄλλ᾽ ἐρεῖς τάχα.
- πέποιθ᾽, ἀρωγὰς δ᾽ ἐκ τάφου πέμψει[*](πέμψει ex schol. Scaliger: πέμπει M) πατήρ.
- νεκροῖσί νυν πέπισθι[*](πέπισθι Veitch: πέπεισθι M) μητέρα κτανών.
- δυοῖν γὰρ εἶχε προσβολὰς μιασμάτοιν.[*](μιασμάτοιν Elmsley: μιασμάτων M)
- πῶς δή; δίδαξον τοὺς δικάζοντας τάδε.
- ἀνδροκτονοῦσα πατέρ᾽ ἐμὸν κατέκτανε.
- τί δ᾽ οὐκ ἐκείνην ζῶσαν ἤλαυνες φυγῇ;
- οὐκ ἦν ὅμαιμος φωτὸς ὃν κατέκτανεν.
- ἐγὼ δὲ μητρὸς τῆς ἐμῆς ἐν αἵματι;