Agamemnon

Aeschylus

Aeschylus, Volume 2. Smyth, Herbert Weir, editor. London; New York: William Heinemann; G.P. Putnam's Sons, 1926.

  1. χώρας μίασμα καὶ θεῶν ἐγχωρίων
  2. ἔκτεινʼ;Ὀρέστης ἆρά που βλέπει φάος,
  3. ὅπως κατελθὼν δεῦρο πρευμενεῖ τύχῃ
  4. ἀμφοῖν γένηται τοῖνδε παγκρατὴς φονεύς;
Αἴγισθος
  1. ἀλλʼ ἐπεὶ δοκεῖς τάδʼ ἔρδειν καὶ λέγειν, γνώσῃ τάχα
  2. εἶα δή, φίλοι λοχῖται, τοὔργον οὐχ ἑκὰς τόδε.
Χορός
  1. εἶα δή, ξίφος πρόκωπον πᾶς τις εὐτρεπιζέτω.
Αἴγισθος
  1. ἀλλὰ κἀγὼ μὴν πρόκωπος οὐκ ἀναίνομαι θανεῖν.
Χορός
  1. δεχομένοις λέγεις θανεῖν σε· τὴν τύχην δʼ αἱρούμεθα.
Κλυταιμήστρα
  1. μηδαμῶς, ὦ φίλτατʼ ἀνδρῶν, ἄλλα δράσωμεν κακά.
  2. ἀλλὰ καὶ τάδʼ ἐξαμῆσαι πολλά, δύστηνον θέρος.
  3. πημονῆς δʼ ἅλις γʼ ὑπάρχει· μηδὲν αἱματώμεθα.
  4. στείχετʼ αἰδοῖοι γέροντες πρὸς δόμους, πεπρωμένοις τούσδε
  5. πρὶν παθεῖν εἴξαντες ὥρᾳ· χρῆν τάδʼ ὡς ἐπράξαμεν.
  6. εἰ δέ τοι μόχθων γένοιτο τῶνδʼ ἅλις, δεχοίμεθʼ ἄν,
  7. δαίμονος χηλῇ βαρείᾳ δυστυχῶς πεπληγμένοι.
  8. ὧδʼ ἔχει λόγος γυναικός, εἴ τις ἀξιοῖ μαθεῖν.
Αἴγισθος
  1. ἀλλὰ τούσδʼ ἐμοὶ ματαίαν γλῶσσαν ὧδʼ ἀπανθίσαι
  2. κἀκβαλεῖν ἔπη τοιαῦτα δαίμονος πειρωμένους,
  3. σώφρονος γνώμης θʼ ἁμαρτεῖν τὸν κρατοῦντά θʼ ὑβρίσαι.