Agamemnon

Aeschylus

Aeschylus, Volume 2. Smyth, Herbert Weir, editor. London; New York: William Heinemann; G.P. Putnam's Sons, 1926.

  1. ἆ ποῖ ποτʼ ἤγαγές με; πρὸς ποίαν στέγην;
Χορός
  1. πρὸς τὴν Ἀτρειδῶν· εἰ σὺ μὴ τόδʼ ἐννοεῖς,
  2. ἐγὼ λέγω σοι· καὶ τάδʼ οὐκ ἐρεῖς ψύθη.
Κασάνδρα
  1. μισόθεον μὲν οὖν, πολλὰ συνίστορα
  2. αὐτόφονα κακὰ καρατόμα,
  3. ἀνδροσφαγεῖον καὶ πεδορραντήριον.
Χορός
  1. ἔοικεν εὔρις ἡ ξένη κυνὸς δίκην
  2. εἶναι, ματεύει δʼ ὧν ἀνευρήσει φόνον.
Κασάνδρα
  1. μαρτυρίοισι γὰρ τοῖσδʼ ἐπιπείθομαι·
  2. κλαιόμενα τάδε βρέφη σφαγάς,
  3. ὀπτάς τε σάρκας πρὸς πατρὸς βεβρωμένας.
Χορός
  1. τὸ μὲν κλέος σοῦ μαντικὸν πεπυσμένοι
  2. ἦμεν· προφήτας δʼ οὔτινας ματεύομεν.
Κασάνδρα
  1. ἰὼ πόποι, τί ποτε μήδεται;
  2. τί τόδε νέον ἄχος μέγα
  3. μέγʼ ἐν δόμοισι τοῖσδε μήδεται κακὸν
  4. ἄφερτον φίλοισιν, δυσίατον; ἀλκὰ δʼ
  5. ἑκὰς ἀποστατεῖ.
Χορός
  1. τούτων ἄιδρίς εἰμι τῶν μαντευμάτων.
  2. ἐκεῖνα δʼ ἔγνων· πᾶσα γὰρ πόλις βοᾷ.