Agamemnon

Aeschylus

Aeschyli Tragoediae. Sidgwick, Arthur, editor. Oxford: Clarendon Press, 1902.

  1. τίθει: θεούς τοι τοῖσδε τιμαλφεῖν χρεών:
  2. ἐν ποικίλοις δὲ θνητὸν ὄντα κάλλεσιν
  3. βαίνειν ἐμοὶ μὲν οὐδαμῶς ἄνευ φόβου.
  4. λέγω κατ᾽ ἄνδρα, μὴ θεόν, σέβειν ἐμέ.
  5. χωρὶς ποδοψήστρων τε καὶ τῶν ποικίλων
  6. κληδὼν ἀυτεῖ: καὶ τὸ μὴ κακῶς φρονεῖν
  7. θεοῦ μέγιστον δῶρον. ὀλβίσαι δὲ χρὴ
  8. βίον τελευτήσαντ᾽ ἐν εὐεστοῖ φίλῃ.
  9. εἰ πάντα δ᾽ ὣς πράσσοιμ᾽[*](πράσσοιμεν Dindorf) ἄν, εὐθαρσὴς ἐγώ.
Κλυταιμήστρα
  1. καὶ μὴν τόδ᾽ εἰπὲ μὴ παρὰ γνώμην ἐμοί.
Ἀγαμέμνων
  1. γνώμην μὲν ἴσθι μὴ διαφθεροῦντ᾽ ἐμέ.
Κλυταιμήστρα
  1. ηὔξω θεοῖς δείσας ἂν ὧδ᾽ ἔρδειν τάδε;
Ἀγαμέμνων
  1. εἴπερ τις, εἰδώς γ᾽ εὖ τόδ᾽ ἐξεῖπον τέλος.
Κλυταιμήστρα
  1. τί δ᾽ ἂν δοκεῖ[*](δοκεῖ Stanley: δοκῇ codd.) σοι Πρίαμος, εἰ τάδ᾽ ἤνυσεν;
Ἀγαμέμνων
  1. ἐν ποικίλοις ἂν κάρτα μοι βῆναι δοκεῖ.[*](δοκῇ Fl)
Κλυταιμήστρα
  1. μή νυν τὸν ἀνθρώπειον αἰδεσθῇς[*](αἰδεσθεὶς Fl) ψόγον.
Ἀγαμέμνων
  1. φήμη γε μέντοι δημόθρους μέγα σθένει.
Κλυταιμήστρα
  1. ὁ δ᾽ ἀφθόνητός γ᾽ οὐκ ἐπίζηλος πέλει.
Ἀγαμέμνων
  1. οὔτοι γυναικός ἐστιν ἱμείρειν μάχης.
Κλυταιμήστρα
  1. τοῖς δ᾽ ὀλβίοις γε καὶ τὸ νικᾶσθαι πρέπει.