Agamemnon

Aeschylus

Aeschyli Tragoediae. Sidgwick, Arthur, editor. Oxford: Clarendon Press, 1902.

  1. ἐμοὶ προφωνῶν, τόν θ᾽ ὑπ᾽ Ἰλίῳ σέθεν
  2. κίνδυνον, εἴ τε δημόθρους ἀναρχία
  3. βουλὴν καταρρίψειεν,[*](καταρράψειεν Scaliger) ὥστε σύγγονον
  4. βροτοῖσι τὸν πεσόντα λακτίσαι πλέον.
  5. τοιάδε μέντοι σκῆψις οὐ δόλον φέρει.
  6. ἔμοιγε μὲν δὴ κλαυμάτων ἐπίσσυτοι
  7. πηγαὶ κατεσβήκασιν, οὐδ᾽ ἔνι σταγών.
  8. ἐν ὀψικοίτοις δ᾽ ὄμμασιν βλάβας ἔχω
  9. τὰς ἀμφί σοι κλαίουσα λαμπτηρουχίας
  10. ἀτημελήτους αἰέν. ἐν δ᾽ ὀνείρασιν
  11. λεπταῖς ὑπαὶ κώνωπος ἐξηγειρόμην
  12. ῥιπαῖσι θωύσσοντος, ἀμφί σοι πάθη
  13. ὁρῶσα πλείω τοῦ ξυνεύδοντος χρόνου.
  14. νῦν ταῦτα πάντα τλᾶσ᾽ ἀπενθήτῳ φρενὶ
  15. λέγοιμ᾽ ἂν ἄνδρα τόνδε τῶν σταθμῶν κύνα,
  16. σωτῆρα ναὸς πρότονον, ὑψηλῆς στέγης
  17. στῦλον[*](στῦλον Fa: στόλον Fl) ποδήρη, μονογενὲς τέκνον πατρί,
  18. καὶ γῆν φανεῖσαν ναυτίλοις παρ᾽ ἐλπίδα,
  19. κάλλιστον ἦμαρ εἰσιδεῖν ἐκ χείματος,
  20. ὁδοιπόρῳ διψῶντι πηγαῖον ῥέος.