Prometheus Bound
Aeschylus
Aeschylus, Volume 1. Smyth, Herbert Weir, editor. London; New York: William Heinemann; G.P. Putnam's Sons, 1922.
- οὐδὲν γὰρ αὐτῷ ταῦτʼ ἐπαρκέσει τὸ μὴ οὐ
- πεσεῖν ἀτίμως πτώματʼ οὐκ ἀνασχετά·
- τοῖον παλαιστὴν νῦν παρασκευάζεται
- ἐπʼ αὐτὸς αὑτῷ, δυσμαχώτατον τέρας·
- ὃς δὴ κεραυνοῦ κρείσσονʼ εὑρήσει φλόγα,
- βροντῆς θʼ ὑπερβάλλοντα καρτερὸν κτύπον·
- θαλασσίαν τε γῆς τινάκτειραν νόσον
- τρίαιναν, αἰχμὴν τὴν Ποσειδῶνος, σκεδᾷ.
- πταίσας δὲ τῷδε πρὸς κακῷ μαθήσεται
- ὅσον τό τʼ ἄρχειν καὶ τὸ δουλεύειν δίχα.
- σύ θην ἃ χρῄζεις, ταῦτʼ ἐπιγλωσσᾷ Διός.
- ἅπερ τελεῖται, πρὸς δʼ ἃ βούλομαι λέγω.
- καὶ προσδοκᾶν χρὴ δεσπόσειν Ζηνός τινα;
- καὶ τῶνδέ γʼ, ἕξει δυσλοφωτέρους πόνους.
- πῶς δʼ οὐχὶ ταρβεῖς τοιάδʼ ἐκρίπτων ἔπη;
- τί δʼ ἂν φοβοίμην ᾧ θανεῖν οὐ μόρσιμον;
- ἀλλʼ ἆθλον ἄν σοι τοῦδʼ ἔτʼ ἀλγίω πόροι.
- ὁ δʼ οὖν ποιείτω· πάντα προσδοκητά μοι.
- οἱ προσκυνοῦντες τὴν Ἀδράστειαν σοφοί.
- σέβου, προσεύχου, θῶπτε τὸν κρατοῦντʼ ἀεί.