Prometheus Bound

Aeschylus

Aeschyli Tragoediae. Sidgwick, Arthur, editor. Oxford: Clarendon Press, 1902.

  1. χρῄζων μιγῆναι τάσδ᾽ ἐπέρριψεν πλάνας.
  2. πικροῦ δ᾽ ἔκυρσας, ὦ κόρη, τῶν σῶν γάμων
  3. μνηστῆρος. οὓς γὰρ νῦν ἀκήκοας λόγους,
  4. εἶναι δόκει σοὶ μηδέπω ᾽ν[*](μηδέπω ᾽ν Turnebus: μηδ᾽ ἐπῶν codd.) προοιμίοις.
Ἰώ
  1. ἰώ μοί μοι, ἐή.
Προμηθεύς
  1. σὺ δ᾽ αὖ κέκραγας κἀναμυχθίζει: τί που
  2. δράσεις, ὅταν τὰ λοιπὰ πυνθάνῃ κακά;
Χορός
  1. ἦ γάρ τι λοιπὸν τῇδε πημάτων ἐρεῖς;
Προμηθεύς
  1. δυσχείμερόν γε πέλαγος ἀτηρᾶς δύης.
Ἰώ
  1. τί δῆτ᾽ ἐμοὶ ζῆν κέρδος, ἀλλ᾽ οὐκ ἐν τάχει
  2. ἔρριψ᾽ ἐμαυτὴν τῆσδ᾽ ἀπὸ στύφλου πέτρας,
  3. ὅπως πέδοι[*](πέδοι Dindorf: πέδω M) σκήψασα τῶν πάντων πόνων
  4. ἀπηλλάγην; κρεῖσσον γὰρ εἰσάπαξ θανεῖν
  5. ἢ τὰς ἁπάσας ἡμέρας πάσχειν κακῶς.
Προμηθεύς
  1. ἦ δυσπετῶς[*](ἦ δυσπετῶς recc.: ἦδυπετῶς correctum in ἡδυπετῶς M) ἂν τοὺς ἐμοὺς ἄθλους φέροις,
  2. ὅτῳ θανεῖν μέν ἐστιν οὐ πεπρωμένον:
  3. αὕτη γὰρ ἦν ἂν πημάτων ἀπαλλαγή:
  4. νῦν δ᾽ οὐδέν ἐστι τέρμα μοι προκείμενον
  5. μόχθων, πρὶν ἂν Ζεὺς ἐκπέσῃ τυραννίδος.
Ἰώ
  1. ἦ γάρ ποτ᾽ ἔστιν ἐκπεσεῖν ἀρχῆς Δία;[*](hos tres vv. in M recitat Io)