Prometheus Bound

Aeschylus

Aeschyli Tragoediae. Sidgwick, Arthur, editor. Oxford: Clarendon Press, 1902.

  1. λέγ᾽, ἐκδίδασκε: τοῖς νοσοῦσί τοι γλυκὺ
  2. τὸ λοιπὸν ἄλγος προυξεπίστασθαι τορῶς.
Προμηθεύς
  1. τὴν πρίν γε χρείαν[*](χρείαν recc.: χρεῖαν τ᾽ M) ἠνύσασθ᾽ ἐμοῦ πάρα
  2. κούφως: μαθεῖν γὰρ τῆσδε πρῶτ᾽ ἐχρῄζετε
  3. τὸν ἀμφ᾽ ἑαυτῆς ἆθλον ἐξηγουμένης:
  4. τὰ λοιπὰ νῦν ἀκούσαθ᾽, οἷα χρὴ πάθη
  5. τλῆναι πρὸς Ἥρας τήνδε τὴν νεάνιδα.
  6. σύ τ᾽, Ἰνάχειον σπέρμα, τοὺς ἐμοὺς λόγους
  7. θυμῷ βάλ᾽,[*](βάλ᾽ recc.: μάθ᾽ M) ὡς ἂν τέρματ᾽ ἐκμάθῃς ὁδοῦ.
  8. πρῶτον μὲν ἐνθένδ᾽ ἡλίου πρὸς ἀντολὰς
  9. στρέψασα σαυτὴν στεῖχ᾽ ἀνηρότους γύας:
  10. Σκύθας δ᾽ ἀφίξει νομάδας, οἳ πλεκτὰς στέγας
  11. πεδάρσιοι ναίουσ᾽[*](ναίουσ᾽ recc.: νέουσ᾽ M) ἐπ᾽ εὐκύκλοις ὄχοις,
  12. ἑκηβόλοις τόξοισιν ἐξηρτυμένοι:[*](ἐξηρτυμένοι rec.: ἐξηρτημένοι M)
  13. οἷς μὴ πελάζειν, ἀλλ᾽ ἁλιστόνοις πόδας[*](πόδας Turnebus: γύποδας codd.)
  14. χρίμπτουσα ῥαχίαισιν ἐκπερᾶν χθόνα.
  15. λαιᾶς δὲ χειρὸς οἱ σιδηροτέκτονες
  16. οἰκοῦσι Χάλυβες, οὓς φυλάξασθαί σε χρή.
  17. ἀνήμεροι γὰρ οὐδὲ πρόσπλατοι[*](πρόσπλατοι Elmsley: πρόσπλαστοι codd.) ξένοις.
  18. ἥξεις δ᾽ Ὑβριστὴν ποταμὸν οὐ ψευδώνυμον,