Persians

Aeschylus

Aeschyli Tragoediae. Sidgwick, Arthur, editor. Oxford: Clarendon Press, 1902.

  1. ὑπερφρονήσας τὸν παρόντα δαίμονα
  2. ἄλλων ἐρασθεὶς ὄλβον ἐκχέῃ μέγαν.
  3. Ζεύς τοι κολαστὴς τῶν ὑπερκόμπων ἄγαν
  4. φρονημάτων ἔπεστιν, εὔθυνος βαρύς.
  5. πρὸς ταῦτ᾽ ἐκεῖνον, σωφρονεῖν κεχρημένον,[*](κεχρημένον e schol. rec. Schütz: κεχρημένοι codd.)
  6. πινύσκετ᾽ εὐλόγοισι νουθετήμασιν,
  7. λῆξαι θεοβλαβοῦνθ᾽ ὑπερκόμπῳ θράσει.
  8. σὺ δ᾽, ὦ γεραιὰ μῆτερ ἡ Ξέρξου φίλη,
  9. ἐλθοῦσ᾽ ἐς οἴκους κόσμον ὅστις εὐπρεπὴς
  10. λαβοῦσ᾽ ὑπαντίαζε παιδί. παντὶ[*](παντὶ Canter: πάντα codd.) γὰρ
  11. κακῶν ὑπ᾽ ἄλγους λακίδες ἀμφὶ σώματι
  12. στημορραγοῦσι ποικίλων ἐσθημάτων.
  13. ἀλλ᾽ αὐτὸν εὐφρόνως σὺ πράυνον λόγοις:
  14. μόνης γάρ, οἶδα, σοῦ κλύων ἀνέξεται.
  15. ἐγὼ δ᾽ ἄπειμι γῆς ὑπὸ ζόφον κάτω.
  16. ὑμεῖς δέ, πρέσβεις, χαίρετ᾽, ἐν κακοῖς ὅμως
  17. ψυχὴν διδόντες ἡδονῇ[*](ψυχὴν ... ἡδονῇ Pauw: ψυχῇ ... ἡδονὴν codd.) καθ᾽ ἡμέραν,
  18. ὡς τοῖς θανοῦσι πλοῦτος οὐδὲν ὠφελεῖ.
Χορός
  1. ἦ πολλὰ καὶ παρόντα καὶ μέλλοντ᾽ ἔτι
  2. ἤλγησ᾽ ἀκούσας βαρβάροισι πήματα.