Persians

Aeschylus

Aeschyli Tragoediae. Sidgwick, Arthur, editor. Oxford: Clarendon Press, 1902.

  1. ἅπαντες ἡμεῖς, οἳ κράτη τάδ᾽ ἔσχομεν,
  2. οὐκ ἂν φανεῖμεν πήματ᾽ ἔρξαντες τόσα.
Χορός
  1. τί οὖν, ἄναξ Δαρεῖε, ποῖ καταστρέφεις
  2. λόγων τελευτήν; πῶς ἂν ἐκ τούτων ἔτι
  3. πράσσοιμεν ὡς ἄριστα Περσικὸς λεώς;
Δαρεῖος
  1. εἰ μὴ στρατεύοισθ᾽ ἐς τὸν Ἑλλήνων τόπον,
  2. μηδ᾽ εἰ στράτευμα πλεῖον ᾖ τὸ Μηδικόν.
  3. αὐτὴ γὰρ ἡ γῆ ξύμμαχος κείνοις πέλει.
Χορός
  1. πῶς τοῦτ᾽ ἔλεξας, τίνι τρόπῳ δὲ συμμαχεῖ;
Δαρεῖος
  1. κτείνουσα λιμῷ τοὺς ὑπερπόλλους[*](ὑπερπόλλους fuerat M: ὑπερπώλους m: ὑπερκόμπους recc. plerique) ἄγαν.
Χορός
  1. ἀλλ᾽ εὐσταλῆ[*](εὐσταλῆ recc.: εὐστελῆ M) τοι λεκτὸν ἀροῦμεν στόλον.
Δαρεῖος
  1. ἀλλ᾽ οὐδ᾽ ὁ μείνας νῦν ἐν Ἑλλάδος τόποις[*](τρόποις M)
  2. στρατὸς κυρήσει νοστίμου σωτηρίας.
Χορός
  1. πῶς εἶπας; οὐ γὰρ πᾶν στράτευμα βαρβάρων
  2. περᾷ τὸν Ἕλλης πορθμὸν Εὐρώπης ἄπο;
Δαρεῖος
  1. παῦροί γε πολλῶν, εἴ τι πιστεῦσαι θεῶν
  2. χρὴ θεσφάτοισιν, ἐς τὰ νῦν πεπραγμένα
  3. βλέψαντα: συμβαίνει γὰρ οὐ τὰ μέν, τὰ δ᾽ οὔ.
  4. κεἴπερ τάδ᾽ ἐστί, πλῆθος ἔκκριτον στρατοῦ
  5. λείπει κεναῖσιν ἐλπίσιν πεπεισμένος.