Pythian

Pindar

Pindar. The Odes of Pindar. Sandys, John Edwin, editor. London: William Heinemann; Cambridge: Harvard University Press. 1937 (reprint).

  1. ὄλβια Λακεδαίμων,
  2. μάκαιρα Θεσσαλία· πατρὸς δʼ ἀμφοτέραις ἐξ ἑνὸς
  3. ἀριστομάχου γένος Ἡρακλεῦς βασιλεύει.
  4. τί κομπέω παρὰ καιρόν; ἀλλά με Πυθώ τε καὶ τὸ Πελινναῖον ἀπύει
  5. Ἀλεύα τε παῖδες, Ἱπποκλέᾳ ἐθέλοντες
  6. ἀγαγεῖν ἐπικωμίαν ἀνδρῶν κλυτὰν ὄπα.
  7. γεύεται γὰρ ἀέθλων·
  8. στρατῷ τʼ ἀμφικτιόνων ὁ Παρνάσιος αὐτὸν μυχὸς
  9. διαυλοδρομᾶν ὕπατον παίδων ἀνέειπεν.
  10. Ἄπολλον, γλυκὺ δʼ ἀνθρώπων τέλος ἀρχά τε δαίμονος ὀρνύντος αὔξεται·
  11. ὁ μέν που τεοῖς γε μήδεσι τοῦτʼ ἔπραξεν·
  12. τὸ δὲ συγγενὲς ἐμβέβακεν ἴχνεσιν πατρὸς
  13. Ὀλυμπιονίκα δὶς ἐν πολεμαδόκοις
  14. Ἄρεος ὅπλοις·
  15. ἔθηκε καὶ βαθυλείμων ὑπὸ Κίρρας ἀγὼν
  16. πέτραν κρατησίποδα Φρικίαν.
  17. ἕσποιτο μοῖρα καὶ ὑστέραισιν
  18. ἐν ἁμέραις ἀγάνορα πλοῦτον ἀνθεῖν σφίσιν·
  19. τῶν δʼ ἐν Ἑλλάδι τερπνῶν
  20. λαχόντες οὐκ ὀλίγαν δόσιν, μὴ φθονεραῖς ἐκ θεῶν
  21. μετατροπίαις ἐπικύρσαιεν. θεὸς εἴη
  22. ἀπήμων κέαρ· εὐδαίμων δὲ καὶ ὑμνητὸς οὗτος ἀνὴρ γίγνεται σοφοῖς,
  23. ὃς ἂν χερσὶν ἢ ποδῶν ἀρετᾷ κρατήσαις
  24. τὰ μέγιστʼ ἀέθλων ἕλῃ τόλμᾳ τε καὶ σθένει,
  25. καὶ ζώων ἔτι νεαρὸν
  26. κατʼ αἶσαν υἱὸν ἴδῃ τυχόντα στεφάνων Πυθίων.
  27. ὁ χάλκεος οὐρανὸς οὔ ποτʼ ἀμβατὸς αὐτῷ.
  28. ὅσαις δὲ βροτὸν ἔθνος ἀγλαΐαις ἁπτόμεσθα, περαίνει πρὸς ἔσχατον
  29. πλόον. ναυσὶ δʼ οὔτε πεζὸς ἰών κεν εὕροις
  30. ἐς Ὑπερβορέων ἀγῶνα θαυματὰν ὁδόν.
  31. παρʼ οἷς ποτε Περσεὺς ἐδαίσατο λαγέτας,
  32. δώματʼ ἐσελθών,
  33. κλειτὰς ὄνων ἑκατόμβας ἐπιτόσσαις θεῷ
  34. ῥέζοντας· ὧν θαλίαις ἔμπεδον
  35. εὐφαμίαις τε μάλιστʼ Ἀπόλλων
  36. χαίρει, γελᾷ θʼ ὁρῶν ὕβριν ὀρθίαν κνωδάλων.
  37. Μοῖσα δʼ οὐκ ἀποδαμεῖ
  38. τρόποις ἐπὶ σφετέροισι· παντᾷ, δὲ χοροὶ παρθένων
  39. λυρᾶν τε βοαὶ καναχαί τʼ αὐλῶν δονέονται·
  40. δάφνᾳ τε χρυσέᾳ κόμας ἀναδήσαντες εἰλαπινάζοισιν εὐφρόνως.
  41. νόσοι δʼ οὔτε γῆρας οὐλόμενον κέκραται
  42. ἱερᾷ γενεᾷ· πόνων δὲ καὶ μαχᾶν ἄτερ
  43. οἰκέοισι φυγόντες
  44. ὑπέρδικον Νέμεσιν. θρασείᾳ δὲ πνέων καρδίᾳ
  45. μόλεν Δανάας ποτὲ παῖς, ἁγεῖτο δʼ Ἀθάνα,
  46. ἐς ἀνδρῶν μακάρων ὅμιλον· ἔπεφνέν τε Γοργόνα, καὶ ποικίλον κάρα
  47. δρακόντων φόβαισιν ἤλυθε νασιώταις
  48. λίθινον θάνατον φέρων. ἐμοὶ δὲ θαυμάσαι
  49. θεῶν τελεσάντων οὐδέν ποτε φαίνεται
  50. ἔμμεν ἄπιστον.
  51. κώπαν σχάσον, ταχὺ δʼ ἄγκυραν ἔρεισον χθονὶ
  52. πρῴραθε, χοιράδος ἄλκαρ πέτρας.
  53. ἐγκωμίων γὰρ ἄωτος ὕμνων
  54. ἐπʼ ἄλλοτʼ ἄλλον ὥτε μέλισσα θύνει λόγον.
  55. ἔλπομαι δʼ Ἐφυραίων
  56. ὄπʼ ἀμφὶ Πηνεϊὸν γλυκεῖαν προχεόντων ἐμὰν
  57. τὸν Ἱπποκλέαν ἔτι καὶ μᾶλλον σὺν ἀοιδαῖς
  58. ἕκατι στεφάνων θαητὸν ἐν ἅλιξι θησέμεν ἐν καὶ παλαιτέροις,
  59. νέαισίν τε παρθένοισι μέλημα. καὶ γὰρ
  60. ἑτέροις ἑτέρων ἔρως ὑπέκνισε φρένας·
  61. τῶν δʼ ἕκαστος ὀρούει,
  62. τυχών κεν ἁρπαλέαν σχέθοι φροντίδα τὰν πὰρ ποδός·
  63. τὰ δʼ εἰς ἐνιαυτὸν ἀτέκμαρτον προνοῆσαι.
  64. πέποιθα ξενίᾳ προσανέϊ Θώρακος, ὅσπερ ἐμὰν ποιπνύων χάριν
  65. τόδʼ ἔζευξεν ἅρμα Πιερίδων τετράορον,
  66. φιλέων φιλέοντʼ, ἄγων ἄγοντα προφρόνως.
  67. πειρῶντι δὲ καὶ χρυσὸς ἐν βασάνῳ πρέπει
  68. καὶ νόος ὀρθός.
  69. ἀδελφεοὺς Ἔτʼ ἐπαινήσομεν ἐσλούς, ὅτι
  70. ὑψοῦ φέροντι νόμον Θεσσαλῶν
  71. αὔξοντες· ἐν δʼ ἀγαθοῖσι κεῖνται
  72. πατρώϊαι κεδναὶ πολίων κυβερνάσιες.