Theriaca

Nicander of Colophon

Nicander of Colophon. Nicandrea. Theriaca et Alexipharmaca. Schneider, Otto, editor. Leipzig: Teubner, 1856.

  1. Ἀλλ’ ἤτοι γερύνων καναχοὶ περίαλλα τοκῆες
  2. βάτραχοι ἐν χύτρῃσι καθεψηθέντες ἄριστοι
  3. βάμματι· πολλάκι δ’ ἧπαρ ἐνὶ σχεδίῃ ποθὲν οἴνῃ,
  4. ἢ αὐτοῦ σίνταο κάρη κακὸν ἄλλοτε νύμφαις
  5. ἐμπισθὲν, τοτὲ δ’ οἴνου ἐνὶ σταγόνεσσιν ἀρήξει.
  6. Μὴ σύ γ’ ἑλιχρύσοιο λιπεῖν πολυδευκέος ἄνθην,
  7. κόρκορον ἢ μύωπα, πανάκτειόν τε κονίλην,
  8. ἥν τε καὶ Ἡράκλειον ὀρίγανον ἀμφὶς ἔπουσι·
  9. σὺν καὶ ὄνου πετάλειον ὀριγάνου, αὖά τε θύμβρης
  10. στρομβεῖα ψώχοιο, κακῆς ἐμφόρβια νούσου.
  11. Ἄγρει μὰν ὀλίγαις μηκωνίσι ῥάμνον ἐίσην
  12. ἐρσομένην, ἀργῆτι δ’ ἀεὶ περιδέδρομεν ἄνθῃ·
  13. τὴν ἤτοι φιλεταιρίδ’ ἐπίκλησιν καλέουσιν
  14. ἀνέρες, οἱ Τμώλοιο παραὶ Γύγαό τε σῆμα
  15. Παρθένιον ναίουσι λέπας, τόθι Κίλβιν ἀεργοὶ
  16. ἵπποι χιλεύουσι καὶ ἀντολαί εἰσι Καύστρου.
  17. Νῦν δ’ ἄγε τοι ῥίζας ἐρέω ἐχίεσσιν ἀρωγούς.
  18. Ἔνθα δύω ἐχίεια πιφαύσκεο· τῆς δὲ τὸ μέν που
  19. ἀγχούσῃ προσέοικεν ἀκανθῆεν πετάλειον·
  20. παῦρον ἐπεὶ, τυτθὸν δὲ καὶ ἐν χθονὶ πυθμένα τείνει.