Thesmophoriazusae

Aristophanes

Aristophanes. Aristophanis Comoediae, Vol. 2. Hall, F. W. and Geldart, William M., editors. Oxford: Clarendon Press, 1907.

  1. ἅπασʼ ἀνάγκη· ταῦτα γάρ τοι γνοὺς ἐγὼ
  2. ἐμαυτὸν ἐθεράπευσα.
Μνησίλοχος
  1. πῶς πρὸς τῶν θεῶν;
Εὐριπίδης
  1. παῦσαι βαΰζων· καὶ γὰρ ἐγὼ τοιοῦτος ἦν
  2. ὢν τηλικοῦτος, ἡνίκʼ ἠρχόμην ποιεῖν.
Μνησίλοχος
  1. μὰ τὸν Δίʼ οὐ ζηλῶ σε τῆς παιδεύσεως.
Εὐριπίδης
  1. ἀλλʼ ὧνπερ οὕνεκʼ ἦλθον, ἔα μʼ εἰπεῖν.
Ἀγάθων
  1. λέγε.
Εὐριπίδης
  1. Ἀγάθων, σοφοῦ πρὸς ἀνδρός, ὅστις ἐν βραχεῖ
  2. πολλοὺς καλῶς οἷός τε συντέμνειν λόγους.
  3. ἐγὼ δὲ καινῇ ξυμφορᾷ πεπληγμένος
  4. ἱκέτης ἀφῖγμαι πρὸς σέ.
Ἀγάθων
  1. τοῦ χρείαν ἔχων;
Εὐριπίδης
  1. μέλλουσί μʼ αἱ γυναῖκες ἀπολεῖν τήμερον
  2. τοῖς Θεσμοφορίοις, ὅτι κακῶς αὐτὰς λέγω.
Ἀγάθων
  1. τίς οὖν παρʼ ἡμῶν ἐστιν ὠφέλειά σοι;
Εὐριπίδης
  1. ἡ πᾶσʼ· ἐὰν γὰρ ἐγκαθεζόμενος λάθρᾳ
  2. ἐν ταῖς γυναιξίν, ὡς δοκῶν εἶναι γυνή,
  3. ὑπεραποκρίνῃ μου, σαφῶς σώσεις ἐμέ.
  4. μόνος γὰρ ἂν λέξειας ἀξίως ἐμοῦ.