Birds

Aristophanes

Aristophanes. Aristophanis Comoediae, Vol. 1. Hall, F. W. and Geldart, William M., editors. Oxford: Clarendon Press, 1906.

  1. φησί μʼ εὖ λέγειν πάνυ.
Ποσειδῶν
  1. εἴ τοι δοκεῖ σφῷν ταῦτα, κἀμοὶ συνδοκεῖ.
Ἡρακλῆς
  1. οὗτος, δοκεῖ δρᾶν ταῦτα τοῦ σκήπτρου πέρι.
Πισθέταιρος
  1. καὶ νὴ Δίʼ ἕτερόν γʼ ἐστὶν οὗ ʼμνήσθην ἐγώ.
  2. τὴν μὲν γὰρ Ἥραν παραδίδωμι τῷ Διί,
  3. τὴν δὲ Βασίλειαν τὴν κόρην γυναῖκʼ ἐμοὶ
  4. ἐκδοτέον ἐστίν.
Ποσειδῶν
  1. οὐ διαλλαγῶν ἐρᾷς.
  2. ἀπίωμεν οἴκαδʼ αὖθις.
Πισθέταιρος
  1. ὀλίγον μοι μέλει.
  2. μάγειρε τὸ κατάχυσμα χρὴ ποιεῖν γλυκύ.
Ἡρακλῆς
  1. ὦ δαιμόνιʼ ἀνθρώπων Πόσειδον ποῖ φέρει;
  2. ἡμεῖς περὶ γυναικὸς μιᾶς πολεμήσομεν;
Ποσειδῶν
  1. τί δαὶ ποιῶμεν;
Ἡρακλῆς
  1. ὅ τι; διαλλαττώμεθα.
Ποσειδῶν
  1. τί δʼ ᾠζύρʼ; οὐκ οἶσθʼ ἐξαπατώμενος πάλαι;
  2. βλάπτεις δέ τοι σὺ σαυτόν. ἢν γὰρ ἀποθάνῃ
  3. ὁ Ζεὺς παραδοὺς τούτοισι τὴν τυραννίδα,
  4. πένης ἔσει σύ. σοῦ γὰρ ἅπαντα γίγνεται
  5. τὰ χρήμαθʼ, ὅσʼ ἂν ὁ Ζεὺς ἀποθνῄσκων καταλίπῃ.