Knights

Aristophanes

Aristophanes. Aristophanis Comoediae, Vol. 1. Hall, F. W. and Geldart, William M., editors. Oxford: Clarendon Press, 1906.

  1. ἵνα μή μʼ ὁ χρησμὸς τὸ πέος οὑτοσὶ δάκῃ.
Ἀλλαντοπώλης
  1. φράζευ Ἐρεχθεΐδη κύνα Κέρβερον ἀνδραποδιστήν,
  2. ὃς κέρκῴ σαίνων σʼ ὁπόταν δειπνῇς ἐπιτηρῶν
  3. ἐξέδεταί σου τοὔψον, ὅταν σύ ποι ἄλλοσε χάσκῃς·
  4. ἐσφοιτῶν τʼ ἐς τοὐπτάνιον λήσει σε κυνηδὸν
  5. νύκτωρ τὰς λοπάδας καὶ τὰς νήσους διαλείχων.
Δῆμος
  1. νὴ τὸν Ποσειδῶ πολύ γʼ ἄμεινον ὦ Γλάνι.
Κλέων
  1. ὦ τᾶν ἄκουσον, εἶτα διάκρινον τόδε.
  2. ἔστι γυνή, τέξει δὲ λέονθʼ ἱεραῖς ἐν Ἀθήναις,
  3. ὃς περὶ τοῦ δήμου πολλοῖς κώνωψι μαχεῖται
  4. ὥστε περὶ σκύμνοισι βεβηκώς· τὸν σὺ φυλάξαι,
  5. τεῖχος ποιήσας ξύλινον πύργους τε σιδηροῦς.
  6. ταῦτʼ οἶσθʼ ὅ τι λέγει;
Δῆμος
  1. μὰ τὸν Ἀπόλλω ʼγὼ μὲν οὔ.
Κλέων
  1. ἔφραζεν ὁ θεός σοι σαφῶς σῴζειν ἐμέ·
  2. ἐγὼ γὰρ ἀντὶ τοῦ λέοντός εἰμί σοι.
Δῆμος
  1. καὶ πῶς μʼ ἐλελήθης Ἀντιλέων γεγενημένος;
Ἀλλαντοπώλης
  1. ἓν οὐκ ἀναδιδάσκει σε τῶν λογίων ἑκών,
  2. ὃ μόνον σιδηροῦν ἐστι τεῖχος καὶ ξύλον,
  3. ἐν ᾧ σε σῴζειν τόνδʼ ἐκέλευσʼ ὁ Λοξίας.