Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- τῶν ἄλλων ἀπάνευθε καθέζετο κύδεϊ γαίων
- εἰσορόων Τρώων τε πόλιν καὶ νῆας Ἀχαιῶν
- χαλκοῦ τε στεροπήν, ὀλλύντάς τʼ ὀλλυμένους τε.
- ὄφρα μὲν ἠὼς ἦν καὶ ἀέξετο ἱερὸν ἦμαρ,
- τόφρα μάλʼ ἀμφοτέρων βέλεʼ ἥπτετο, πῖπτε δὲ λαός·
- ἦμος δὲ δρυτόμος περ ἀνὴρ ὁπλίσσατο δεῖπνον
- οὔρεος ἐν βήσσῃσιν, ἐπεί τʼ ἐκορέσσατο χεῖρας
- τάμνων δένδρεα μακρά, ἅδος τέ μιν ἵκετο θυμόν,
- σίτου τε γλυκεροῖο περὶ φρένας ἵμερος αἱρεῖ,
- τῆμος σφῇ ἀρετῇ Δαναοὶ ῥήξαντο φάλαγγας
- κεκλόμενοι ἑτάροισι κατὰ στίχας· ἐν δʼ Ἀγαμέμνων
- πρῶτος ὄρουσʼ, ἕλε δʼ ἄνδρα Βιάνορα ποιμένα λαῶν
- αὐτόν, ἔπειτα δʼ ἑταῖρον Ὀϊλῆα πλήξιππον.
- ἤτοι ὅ γʼ ἐξ ἵππων κατεπάλμενος ἀντίος ἔστη·
- τὸν δʼ ἰθὺς μεμαῶτα μετώπιον ὀξέϊ δουρὶ
- νύξʼ, οὐδὲ στεφάνη δόρυ οἱ σχέθε χαλκοβάρεια,
- ἀλλὰ διʼ αὐτῆς ἦλθε καὶ ὀστέου, ἐγκέφαλος δὲ
- ἔνδον ἅπας πεπάλακτο· δάμασσε δέ μιν μεμαῶτα.
- καὶ τοὺς μὲν λίπεν αὖθι ἄναξ ἀνδρῶν Ἀγαμέμνων
- στήθεσι παμφαίνοντας, ἐπεὶ περίδυσε χιτῶνας·