Philoctetes

Sophocles

Sophocles, Volume 2. Storr, Francis, editor. London; New York: William Heinemann Ltd.; The Macmillan Company, 1913.

  1. σκοπεῖν μάλιστα, μὴ διαφθαρεὶς λάθῃ.
Χορός
  1. οἴκτιρʼ, ἄναξ· πολλῶν ἔλεξεν δυσοίστων πόνων
  2. ἆθλʼ, οἷα μηδεὶς τῶν ἐμῶν τύχοι φίλων.
  3. εἰ δὲ πικρούς, ἄναξ, ἔχθεις Ἀτρείδας,
  4. ἐγὼ μέν, τὸ κείνων κακὸν τῷδε κέρδος
  5. μετατιθέμενος, ἔνθαπερ ἐπιμέμονεν,
  6. ἐπʼ εὐστόλου ταχείας νεὼς
  7. πορεύσαιμʼ ἂν ἐς δόμους, τὰν θεῶν
  8. νέμεσιν ἐκφυγών.
Νεοπτόλεμος
  1. ὅρα σὺ μὴ νῦν μέν τις εὐχερὴς παρῇς,
  2. ὅταν δὲ πλησθῇς τῆς νόσου ξυνουσίᾳ,
  3. τότʼ οὐκέθʼ αὑτὸς τοῖς λόγοις τούτοις φανῇς.
Χορός
  1. ἥκιστα· τοῦτʼ οὐκ ἔσθʼ ὅπως ποτʼ εἰς ἐμὲ
  2. τοὔνειδος ἕξεις ἐνδίκως ὀνειδίσαι.
Νεοπτόλεμος
  1. ἀλλʼ αἰσχρὰ μέντοι σοῦ γέ μʼ ἐνδεέστερον
  2. ξένῳ φανῆναι πρὸς τὸ καίριον πονεῖν.
  3. ἀλλʼ εἰ δοκεῖ, πλέωμεν, ὁρμάσθω ταχύς·
  4. χἠ ναῦς γὰρ ἄξει κοὐκ ἀπαρνηθήσεται.
  5. μόνον θεοὶ σῴζοιεν ἔκ τε τῆσδε γῆς
  6. ἡμᾶς ὅποι τʼ ἐνθένδε βουλοίμεσθα πλεῖν.