Antigone

Sophocles

Sophocles, Volume 1. Storr, Francis, editor. London; New York: William Heinemann Ltd.; The Macmillan Company, 1912.

  1. ἀλλʼ ἄνδρα, κεἴ τις ᾖ σοφός, τὸ μανθάνειν
  2. πόλλʼ, αἰσχρὸν οὐδὲν καὶ τὸ μὴ τείνειν ἄγαν.
  3. ὁρᾷς παρὰ ῥείθροισι χειμάρροις ὅσα
  4. δένδρων ὑπείκει, κλῶνας ὡς ἐκσῴζεται,
  5. τὰ δʼ ἀντιτείνοντʼ αὐτόπρεμνʼ ἀπόλλυται.
  6. αὕτως δὲ ναὸς ὅστις ἐγκρατῆ πόδα
  7. τείνας ὑπείκει μηδέν, ὑπτίοις κάτω
  8. στρέψας τὸ λοιπὸν σέλμασιν ναυτίλλεται.
  9. ἀλλʼ εἶκε καὶ θυμῷ μετάστασιν δίδου.
  10. γνώμη γὰρ εἴ τις κἀπʼ ἐμοῦ νεωτέρου
  11. πρόσεστι, φήμʼ ἔγωγε πρεσβεύειν πολὺ
  12. φῦναι τὸν ἄνδρα πάντʼ ἐπιστήμης πλέων·
  13. εἰ δʼ οὖν, φιλεῖ γὰρ τοῦτο μὴ ταύτῃ ῥέπειν,
  14. καὶ τῶν λεγόντων εὖ καλὸν τὸ μανθάνειν.
Χορός
  1. ἄναξ, σέ τʼ εἰκός, εἴ τι καίριον λέγει,
  2. μαθεῖν, σέ τʼ αὖ τοῦδʼ· εὖ γὰρ εἴρηται διπλῇ.