Fragmenta

Euripides

Euripides. Fragmenta. Tragicorum Graecorum Fragmenta. Nauck, August, editor. Leipzig: Teubner, 1889.

  1. ἀργὸς πολίτης κεῖνος, ὡς κακός γ’ ἀνήρ.
  1. ἴσως ἀλάστορ’ οὐκ ἐτόλμησεν κτανεῖν.
  1. Καλυδὼν μὲν ἥδε γαῖα, Πελοπίας χθονὸς
  2. ἐν ἀντιπόρθμοις πεδί’ ἔχουσ’ εὐδαίμονα·
  3. Οἰνεὺς δ’ ἀνάσσει τῆσδε γῆς Αἰτωλίας,
  4. Πορθάονος παῖς, ὅς ποτ’ Ἀλθαίαν γαμεῖ,
  5. Λήδας ὅμαιμον, Θεστίου δὲ παρθένον.
  1. Οἰνεύς ποτ’ ἐκ γῆς πολύμετρον λαβὼν στάχυν
  2. θύων ἀπαρχάς
  1. Μελέαγρε, μελέαν γάρ ποτ’ ἀγρεύεις ἄγραν
  1. καὶ κτῆμα δ’, ὦ τεκοῦσα, κάλλιστον τόδε,
  2. πλούτου δὲ κρεῖσσον· τοῦ μὲν ὠκεῖα πτέρυξ,
  3. παῖδες δὲ χρηστοί, κἂν θάνωσι, δώμασιν
  4. καλόν τι θησαύρισμα τοῖς τεκοῦσί τε
  5. ἀνάθημα βιότου κοὔποτ’ ἐκλείπει δόμους.
  1. δειλοὶ γὰρ ἄνδρες οὐκ ἔχουσιν ἐν μάχῃ
  2. ἀριθμόν, ἀλλ’ ἄπεισι κἂν παρῶσ’ ὅμως.
  1. ἡγησάμην οὖν, εἰ παραζεύξειέ τις
  2. χρηστῷ πονηρὸν λέκτρον, οὐκ ἂν εὐτεκνεῖν,
  3. ἐσθλοῖν δ’ ἀπ’ ἀμφοῖν ἐσθλὸν ἂν φῦναι γόνον.
  1. ἔνδον μένουσαν τὴν γυναῖκ’ εἶναι χρεὼν
  2. ἐσθλήν, θύρασι δ’ ἀξίαν τοῦ μηδενός.
  1. εἰ κερκίδων μὲν ἀνδράσιν μέλοι πόνος,
  2. γυναιξὶ δ’ ὅπλων ἐμπέσοιεν ἡδοναί·
  3. ἐκ τῆς ἐπιστήμης γὰρ ἐκπεπτωκότες
  4. κεῖνοί τ’ ἂν οὐδὲν εἶεν οὔθ’ ἡμεῖς ἔτι.
  1. κερκίδος ἀοιδοῦ μελέτας
  1. ἡ γὰρ Κύπρις πέφυκε τῷ σκότῳ φίλη,
  2. τὸ φῶς δ’ ἀνάγκην προστίθησι σωφρονεῖν.
  1. εἰ δ’ εἰς γάμους ἔλθοιμ’, ὃ μὴ τύχοι ποτέ,
  2. τῶν ἐν δόμοισιν ἡμερευουσῶν ἀεὶ
  3. βελτίον’ ἂν τέκοιμι λήμασιν τέκνα·
  4. ἐκ γὰρ πατρὸς καὶ μητρὸς ὅστις ἐκπονεῖ
  5. σκληρὰς διαίτας οἱ γόνοι βελτίονες.
  1. τό τοι κράτιστον, κἂν γονῇ κακός τις ᾖ,
  2. τοῦτ’ ἔστιν ἀρετή· τὸ δ’ ὄνομ’ οὐ διαφθερεῖ.
  1. μόνον δ’ ἂν ἀντὶ χρημάτων οὐκ ἂν λάβοις
  2. γενναιότητα κἀρετήν· καλὸς δέ τις
  3. κἂν ἐκ πενήτων σωμάτων γένοιτο παῖς.
  1. μισῶ γυναῖκα . . , ἐκ πασῶν δὲ σέ,
  2. ἥτις πονηρὰ τἄργ’ ἔχουσ’ 〈εἶτ’〉 εὖ λέγεις.
  1. ὡς ἡδὺ δούλοις δεσπότας χρηστοὺς λαβεῖν
  2. καὶ δεσπόταισι δοῦλον εὐμενῆ δόμοις.
  1. Τελαμὼν δὲ χρυσοῦν αἰετὸν πέλτης ἔπι
  2. πρόβλημα θηρός, βότρυσι δ’ ἔστεψεν κάρα,
  3. Σαλαμῖνα κοσμῶν πατρίδα τὴν εὐάμπελον.
  4. Κύπριδος δὲ μίσημ’, Ἀρκὰς Ἀταλάντη, κύνας
  5. καὶ τόξ’ ἔχουσα, πελέκεως δὲ δίστομον
  6. γένυν ἔπαλλ’ Ἀγκαῖος· οἱ δὲ Θεστίου
  7. παῖδες τὸ λαιὸν ἴχνος ἀνάρβυλοι ποδός,
  8. τὸ δ’ ἐν πεδίλοις, ὡς ἐλαφρίζον γόνυ
  9. ἔχοιεν, ὃς δὴ πᾶσιν Αἰτωλοῖς νόμος.
  1. σιδηροβριθές τ’ ἔλαβε δεξιᾷ ξύλον
  1. τοὺς ζῶντας εὖ δρᾶν· κατθανὼν δὲ πᾶς ἀνὴρ
  2. γῆ καὶ σκιά· τὸ μηδὲν εἰς οὐδὲν ῥέπει.