Fragmenta

Euripides

Euripides. Fragmenta. Tragicorum Graecorum Fragmenta. Nauck, August, editor. Leipzig: Teubner, 1889.

  1. τερπνὸν τὸ φῶς τόδ’· ὁ δ’ ὑπὸ γῆς Ἅιδου σκότος
  2. οὐδ’ εἰς ὄνειρον ἡδὺς ἀνθρώποις μολεῖν.
  3. ἐγὼ μὲν οὖν γεγῶσα τηλικήδ’ ὅμως
  4. ἀπέπτυσ’ αὐτὸ κοὔποτ’ εὔχομαι θανεῖν.
  1. τὸ μὲν γὰρ· ἐν φῶ, τὸ δὲ κάτω σκότος κακόν.
  1. ὁρᾷς σὺ νῦν δή μ’ ὡς ἐπράυνας, τύχη.
  1. φεῦ, τὰ τῶν εὐδαιμονούντων ὡς τάχιστα στρέφει θεός.
  1. εἰς ἀνδροβρῶτας ἡδονὰς ἀφίξεται
  2. κάρηνα πυρσαῖς γένυσι Μελανίππου σπάσας.
  1. ἀντήλιοι θεοί
  1. καθωσίωσε
  1. οὐρὰν δ’ ὑπίλασ’ ὑπὸ λεοντόπουν βάσιν
  2. καθίζετο. .
  1. ἡμεῖς δὲ Πολύβου παῖδ’ ἐρείσαντες πέδῳ
  2. ἐξομματοῦμεν καὶ διόλλυμεν κόρας.
  1. οὔτοι νόμισμα λευκὸς ἄργυρος μόνον
  2. καὶ χρυσός ἐστιν, ἀλλὰ κἀρετὴ βροτοῖς
  3. νόμισμα κεῖται πᾶσιν, ᾗ χρῆσθαι χρεών.
  1. μεγάλη τυραννὶς ἀνδρὶ τέκνα καὶ γυνή·
  2. ἴσην γὰρ ἀνδρὶ συμφορὰν εἶναι λέγω
  3. τέκνων θ’ ἁμαρτεῖν καὶ πάτρας καὶ χρημάτων
  4. ἀλόχου τε κεδνῆς, ὡς μόνον τῶν χρημάτων
  5. ἢ κρεῖσσόν ἐστιν ἀνδρί, σώφρον’ ἢν λάβῃ.
  1. ἄλλως δὲ πάντων δυσμαχώτατον γυνή.
  1. πᾶσα γὰρ δούλη πέφυκεν ἀνδρὸς ἡ σώφρων γυνή·
  2. ἡ δὲ μὴ σώφρων ἀνοίᾳ τὸν ξυνόνθ’ ὑπερφρονεῖ.
  1. πᾶσα γὰρ ἀνδρὸς κακίων ἄλοχος,
  2. κἂν ὁ κάκιστος
  3. γήμῃ τὴν εὐδοκιμοῦσαν.
  1. ἑνὸς 〈δ’〉 ἔρωτος ὄντος οὐ μί’ ἡδονή·
  2. οἳ μὲν κακῶν ἐρῶσιν, οἳ δὲ τῶν καλῶν.
  1. νοῦν χρὴ θεᾶσθαι, νοῦν· τί τῆς εὐμορφίας
  2. ὄφελος, ὅταν τις μὴ φρένας καλὰς ἔχῃ;
  1. ἀλλ’ ἦμαρ 〈ἕν〉 τοι μεταβολὰς πολλὰς ἔχει.
  1. ἐκ τῶν ἀέλπτων ἡ χαρὰ μείζων βροτοῖς
  2. [φανεῖσα μᾶλλον ἢ τὸ προσδοκώμενον].
  1. φθόνος δ’ ὁ πολλῶν φρένα διαφθείρων βροτῶν
  2. ἀπώλεσ’ αὐτὸν κἀμὲ συνδιώλεσεν.
  1. πότερα γενέσθαι δῆτα χρησιμώτερον
  2. συνετὸν ἄτολμον ἢ θρασύν τε κἀμαθῆ;
  3. τὸ μὲν γὰρ αὐτῶν σκαιόν, ἀλλ’ ἀμύνεται,
  4. τὸ δ’ ἡσυχαῖον ἀργόν· ἐν δ’ ἀμφοῖν νόσος.