Helen
Euripides
Euripides. Euripidis Fabulae, Vol. III. Murray, Gilbert, editor. Oxford: Clarendon Press, 1913. (Reprinted 1920-1978)
- αἰθήρ, ὅθεν σὺ θεοπόνητʼ ἔχεις λέχη.
- τίνος πλάσαντος θεῶν; ἄελπτα γὰρ λέγεις.
- Ἥρας, διάλλαγμʼ, ὡς Πάρις με μὴ λάβοι.
- πῶς οὖν ἂν ἐνθάδʼ ἦσθά τʼ ἐν Τροίᾳ θʼ ἅμα;
- τοὔνομα γένοιτʼ ἂν πολλαχοῦ, τὸ σῶμα δʼ οὔ.
- μέθες με, λύπης ἅλις ἔχων ἐλήλυθα.
- λείψεις γὰρ ἡμᾶς, τὰ δὲ κένʼ ἐξάξεις λέχη;
- καὶ χαῖρέ γʼ, Ἑλένῃ προσφερὴς ὁθούνεκʼ εἶ.
- ἀπωλόμην· λαβοῦσά σʼ οὐχ ἕξω πόσιν.
- τοὐκεῖ με μέγεθος τῶν πόνων πείθει, σὺ δʼ οὔ.
- οἲ ἐγώ· τίς ἡμῶν ἐγένετʼ ἀθλιωτέρα;
- οἱ φίλτατοι λείπουσί μʼ οὐδʼ ἀφίξομαι
- Ἕλληνας οὐδὲ πατρίδα τὴν ἐμήν ποτε.
- Μενέλαε, μαστεύων σε κιγχάνω μόλις
- πᾶσαν πλανηθεὶς τήνδε βάρβαρον χθόνα,
- πεμφθεὶς ἑταίρων τῶν λελειμμένων ὕπο.
- τί δʼ ἔστιν; οὔ που βαρβάρων συλᾶσθʼ ὕπο;
- θαῦμʼ ἔστʼ, ἔλασσον τοὔνομʼ ἢ τὸ πρᾶγμʼ ἔχον.
- λέγʼ· ὡς φέρεις τι τῇδε τῇ σπουδῇ νέον.
- λέγω πόνους σε μυρίους τλῆναι μάτην.