Ion

Euripides

Euripides. Euripidis Fabulae, Vol. II. Murray, Gilbert, editor. Oxford: Clarendon Press, 1913. (Reprinted 1921-1962)

  1. λέξον, τί θέσπισμʼ ἐκ Τροφωνίου φέρεις,
  2. παίδων ὅπως νῷν σπέρμα συγκραθήσεται;
Ξοῦθος
  1. οὐκ ἠξίωσε τοῦ θεοῦ προλαμβάνειν
  2. μαντεύμαθʼ· ἓν δʼ οὖν εἶπεν· οὐκ ἄπαιδά με
  3. πρὸς οἶκον ἥξειν οὐδὲ σὲ ἐκ χρηστηρίων.
Κρέουσα
  1. ὦ πότνια Φοίβου μῆτερ, εἰ γὰρ αἰσίως
  2. ἔλθοιμεν, ἅ τε νῷν συμβόλαια πρόσθεν ἦν
  3. ἐς παῖδα τὸν σόν, μεταπέσοι βελτίονα.
Ξοῦθος
  1. ἔσται τάδʼ· ἀλλὰ τίς προφητεύει θεοῦ;
Ἴων
  1. ἡμεῖς τά γʼ ἔξω, τῶν ἔσω δʼ ἄλλοις μέλει,
  2. οἳ πλησίον θάσσουσι τρίποδος, ὦ ξένε,
  3. Δελφῶν ἀριστῆς, οὓς ἐκλήρωσεν πάλος.
Ξοῦθος
  1. καλῶς· ἔχω δὴ πάνθʼ ὅσων ἐχρῄζομεν.
  2. στείχοιμʼ ἂν εἴσω· καὶ γάρ, ὡς ἐγὼ κλύω,
  3. χρηστήριον πέπτωκε τοῖς ἐπήλυσι
  4. κοινὸν πρὸ ναοῦ· βούλομαι δʼ ἐν ἡμέρᾳ
  5. τῇδʼ — αἰσία γάρ — θεοῦ λαβεῖν μαντεύματα.
  6. σὺ δʼ ἀμφὶ βωμούς, ὦ γύναι, δαφνηφόρους
  7. λαβοῦσα κλῶνας, εὐτέκνους εὔχου θεοῖς
  8. χρησμούς μʼ ἐνεγκεῖν ἐξ Ἀπόλλωνος δόμων.