Andromache

Euripides

Euripides. Euripidis Fabulae, Vol. I. Murray, Gilbert, editor. Oxford: Clarendon Press, 1902.

  1. πατρός τ’ ἐρημωθεῖσα συννοίᾳ θ’ ἅμα,
  2. οἷον δέδρακεν ἔργον Ἀνδρομάχην κτανεῖν
  3. καὶ παῖδα βουλεύσασα, κατθανεῖν θέλει,
  4. πόσιν τρέμουσα, μὴ ἀντὶ τῶν δεδραμένων
  5. ἐκ τῶνδ’ ἀτίμως δωμάτων ἀποσταλῇ,
  6. ἢ κατθάνῃ κτείνουσα τοὺς οὐ χρὴ κτανεῖν.
  7. μόλις δέ νιν θέλουσαν ἀρτῆσαι δέρην
  8. εἴργουσι φύλακες δμῶες ἔκ τε δεξιᾶς
  9. ξίφη καθαρπάζουσιν ἐξαιρούμενοι.
  10. οὕτω μεταλγεῖ καὶ τὰ πρὶν δεδραμένα
  11. ἔγνωκε πράξασ’ οὐ καλῶς. ἐγὼ μὲν οὖν
  12. δέσποιναν εἴργουσ’ ἀγχόνης κάμνω, φίλαι·
  13. ὑμεῖς δὲ βᾶσαι τῶνδε δωμάτων ἔσω
  14. θανάτου νιν ἐκλύσασθε· τῶν γὰρ ἠθάδων
  15. φίλων νέοι μολόντες εὐπιθέστεροι.
Χορός
  1. καὶ μὴν ἐν οἴκοις προσπόλων ἀκούομεν
  2. βοὴν ἐφ’ οἷσιν ἦλθες ἀγγέλλουσα σύ.
  3. δείξειν δ’ ἔοικεν ἡ τάλαιν’ ὅσον στένει
  4. πράξασα δεινά· δωμάτων γὰρ ἐκπερᾷ
  5. φεύγουσα χεῖρας προσπόλων πόθῳ θανεῖν.