Scholia in Euripidis Orestem (scholia vetera et scholia recentiora Thomae Magistri, Triclinii, Moschopuli et anonyma)

233.

ἦ κἀπὶ γαίας

: ἆρα θέλεις θεῖναι τοὺς πόδας ἐπάνω τῆς γῆς, θεὶς ἴχνος χρόνιον, ἤτοι βραδεῖαν βάσιν; ἡ μεταβολὴ πάντων εὐφραντὸν πρᾶγμα, ὑπάρχει δηλονότι. I.

234.

μεταβολὴ πάντων γλυκύ

: προσυπακουστέον τὸ κακῶν. κεκωμῴδηται δὲ ὁ στίχος. τὸ γὰρ ἐξ ὑγιείας εἰς νόσον μεταβάλλειν οὐκ ἔστιν ἡδύ. φησὶ γοῦν ὁ κωμικός

ὁ πρῶτος εἰπὼν μεταβολὴ πάντων γλυκύ οὐχ ὑγίαινε, δέσποτ’· ἐκ μὲν γὰρ κόπου γλυκεῖ’ ἀνάπαυσις, ἐξ ἀλουσίας δ’ ὕδωρ, (καὶ τὰ τοιαῦτα.) ἣν δ’ ἐκ πλουσίου

πτωχὸς γένηται, μεταβολὴ μὲν, ἡδὺ δ’ οὔ. ὥστ’ οὐχὶ πάντων ἐστὶ μεταβολὴ γλυκύ.

—A. B. C. M.I.

μεταβολὴ πάντων γλυκύ

: τὸ μεταβάλλεσθαι εἴτε ἀπὸ χείρονος πρὸς τὸ βέλτιον, εἴτε ἀπὸ βελτίονος πρὸς τὸ χεῖρον, ἡδύτατόν ἐστιν αὐτῷ τῷ μεταβαλλομένῳ· οὐδὲ γὰρ ἂν μετεβάλλετο, εἰ μὴ ἥδετο τῇ μεταβολῇ, ὥστε οἱ λέγοντες τὸν Εὐριπίδην οὐκ ὀρθῶς εἰρηκέναι τοῦτο οὐ καλῶς λέγουσιν. Gu. I.

μεταβολή

: λείπει τὸ κακῶν, ὅταν μεταβληθῇ τι ἀπὸ τῶν κακῶν εἰς τὸ καλὸν γλυκύ. B. ἡ μεταβολὴ τῶν ἴσων. Gu. Fl. 6. 9. 17. 21. 55. 59. 76.

πάντων

: πραγμάτων. Fl. 59.