Fall of Troy
Quintus Smyrnaeus
Quintus Smyrnaeus. Fall of Troy. Way, Arthur S., editor. London: W. Heinemann; New York: The Macmillan Co., 1913.
- πυκνὰ ποτιπταίει· τρέπεται δέ οἱ αἰόλος οἶμος [*](Zimmermann, for ai)o/lon ei)=dos of v.)
- ἄλλοτε μὲν ποτὶ πῆμα πολύστονον, ἄλλοτε δʼ αὖτε
- εἰς ἀγαθόν· μερόπων δὲ πανόλβιος οὔτις ἐτύχθη
- ἐς τέλος ἐξ ἀρχῆς· ἑτέρῳ δʼ ἕτερʼ ἀντιόωσι.
- παῦρον δὲ ζώοντας ἐν ἄλγεσιν οὔτι ἔοικε
- ζωέμεν. ἔλπεο δʼ αἰὲν ἀρείονα, μηδʼ ἐπὶ λυγρῷ
- θυμὸν ἔχειν· καὶ γάρ ῥα πέλει φάτις ἀνθρώποισιν
- ἐσθλὼν μὲν νίσσεσθαι ἐς οὐρανὸν ἄφθιτον αἰεὶ
- ψυχάς, [*](Restored by Zimmermann from P.) ἀργαλέων δὲ ποτὶ ζόφον· ἔπλετο δʼ ἄμφω
- σεῖο κασιγνήτῳ· καὶ μείλιχος ἔσκε βροτοῖσι,
- καὶ πάϊς ἀθανάτοιο· θεῶν δʼ ἐς φῦλον ὀΐω
- κεῖνον ἀνελθέμεναι σφετέρου πατρὸς ἐννεσίῃσιν.
- ὣς εἰπών μιν ἔγειρεν ἀπὸ χθονὸς οὐκ ἐθέλοντα
- παρφάμενος μύθοισιν, ἄγεν δʼ ἀπὸ σήματος αἰνοῦ
- ἐντροπαλιζόμενον καὶ ἔτʼ ἀργαλέα στενάχοντα·
- ἐς δʼ ἄρα νῆας ἵκοντο· πόνον δʼ ἔχον ἄλλοι Ἀχαιοὶ
- ἀργαλέον καὶ Τρῶες ὀρινομένου πολέμοιο.
- Εὐρύπυλος δʼ ἀτάλαντος ἀτειρέα θυμὸν Ἄρηι
- χερσὶν ὑπʼ ἀκαμάτῃσι καὶ ἔγχεϊ μαιμώωντι
- δάμνατο δήϊα φῦλα· νεκρῶν δʼ ἐστείνετο γαῖα