Fall of Troy
Quintus Smyrnaeus
Quintus Smyrnaeus. Fall of Troy. Way, Arthur S., editor. London: W. Heinemann; New York: The Macmillan Co., 1913.
- ἀλλὰ Πάρις ξενίοιο Διὸς καὶ σεῖο τραπέζης
- λησάμενος· τῷ καί μιν ἐν ἄλγεσι τίσατο δαίμων.
- ὣς φάθʼ· ὁ δʼ αἶψʼ ἐπίθησε. θεοὶ δʼ ἐρικυδέα Τροίην
- κυανέοις νεφέεσσι καλυψάμενοι γοάασκον,
- νόσφιν ἐϋπλοκάμου Τριτωνίδος ἠδὲ καὶ Ἥρης.
- αἳ μέγα κυδιάασκον ἀνὰ φρένας, εὖτʼ ἐσίδοντο
- περθόμενον κλυτὸν ἄστυ θεηγενέος Πριάμοιο.
- ἀλλʼ οὐ μὰν οὐδʼ αὐτὴ ἐΰφρων Τριτογένεια
- πάμπαν ἄδακρυς ἔην, ἐπεὶ ἦ ῥά οἱ ἔνδοθι νηοῦ
- Κασσάνδρην ᾔσχυνεν Ὀϊλέος ὄβριμος υἱὸς
- θυμοῦ τʼ ἠδὲ νόοιο βεβλαμμένος· ἡ δέ οἱ αἰνὸν
- εἰσοπίσω βάλε πῆμα καὶ ἀνέρα τίσατο λώβης·
- οὐδὲ μὲν ἔργον ἀεκιὲς ἐσέδρακεν, ἀλλά οἱ αἰδὼς
- καὶ χόλος ἀμφεχύθη· βλοσυρὰς δʼ ἔτρεψεν ὀπωπὰς
- νηὸν ἐς ὑψόροφον· περὶ δʼ ἔβραχε θεῖον ἄγαλμα,
- καὶ δάπεδον νηοῖο μέγ ἔτρεμεν· οὐδʼ ὅ γε λυγρῆς
- λῆγεν ἀτασθαλίης, ἐπεὶ ἦ φρένας ἄασε Κύπρις.
- πάντῃ δʼ ἄλλοθεν ἄλλα κατηρείποντο μέλαθρα
- ὑψόθεν· ἀζαλέη δὲ κόνις συνερίσγετο καπνῷ·
- ὦρτο δʼ ἄρα κτύπος αἰνός, ὑπετρομέοντο δʼ ἀγυιαί·