Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- καὶ πόδας ἐσφήκωσεν ἐρευθιόωντι κοθόρνῳ,
- χειρὶ δὲ θύρσον ἄειρε, φιλάνθεμον ἔγχος Ἐνυοῦς·
- καὶ Σάτυρον κίκλησκεν ὀπάονα. θεσπεσίην δὲ
- Βακχείων στομάτων ἀίων ἀντίκτυπον ἠχὼ
- κοίρανος ἔγρετο Βότρυς, ἑὸν δʼ ἔνδυνε χιτῶνα·
- καὶ Πίον ὑπνώοντα--- μέθη δʼ ὡς ἔκλυε φωνῆς,
- κρᾶτα μόγις κούφιζε, βαρυνομένου δὲ καρήνου
- ὀκναλέη πάλιν εὗδε· καὶ ὄρθριον εἰσέτι νύμφη
- μίμνεν ἀμεργομένη γλυκερώτερον ὕπνον ὀπωπαῖς,
- ὀψὲ λέκτρον ἔλειπεν ἑῷ βραδυπειθέι ταρσῷ.
- καὶ Στάφυλος φιλόβοτρυς ἐφωμάρτησε Λυαίῳ
- εἰς ὁδὸν ἐσσυμένῳ ξεινήια δῶρα τιταίνων,
- χρύσεον ἀμφιφορῆα σὺν ἀργυρέοισι κυπέλλοις,
- οἷς πάρος αἰὲν ἔπινεν ἀμελγομένων γλάγος αἰγῶν·
- καὶ πόρε ποικίλα πέπλα, τά περ παρὰ Τίγριδος ὕδωρ
- νήματι λεπταλέῳ τεχνήσατο Περσὶς Ἀράχνη.
- καὶ Βρομίῳ πολύδωρος ἅναξ ἐφθέγξατο φωνήν·
- μάρναό μοι, Διόνυσε, καὶ ἄξια ῥέζε τοκῆος·
- δεῖξον, ὅτι Κρονίδαο φέρεις γένος· ἀρτιθαλὴς γὰρ
- γηγενέας Τιτῆνας ἀπεστυφέλιξεν Ὀλύμπου