Ecclesiasticus sive Siracides (Sapientia Jesu filii Sirach)
Septuaginta
Septuaginta. The Old Testament in Greek According to the Septuagint. Volume 2: I Chronicles-Tobit. Swete, Henry Barclay, editor. Cambridge: Cambridge University Press, 1896.
- ἐπεκαλεσάμην Κύριον πατέρα κυρίου μου,
- μὴ με ἐγκαταλιπεῖν ἐν ἡμέραις θλίψεως,
- ἐν καιρῷ ὑπερηφανιῶν ἀβοηθησίας.
- αἰνέσω τὸ ὄνομά σου ἐνδελεχῶς,
- καὶ ὑμνήσω ἐν ἐξομολογήσει
- καὶ εἰσηκούσθη ἡ δέησίς μου.
- ἔσωσας γάρ με ἐξ ἀπωλείας,
- καὶ ἐξείλου με ἐκ καιροῦ πονηροῦ·
- (17)διὰ τοῦτο ἐξομολογήσομαι καὶ αἰνέσω σοι,
- καὶ εὐλογήσω τῷ ὀνόματι Κυρίου.
- Ἔτι ὢν νεώτερος πρὶν ἢ πλατηθῆναί με,
- ἐζήτησα σοφίαν προφανῶς ἐν προσευχῇ μου·
- ἔναντι ναοῦ ἠξίουν περὶ αὐτῆς,
- καὶ ἕως ἐσχάτων ἐκζητήσω αὐτήν.
- ἐξ ἄνθους ὡς περκαζούσης σταφυλῆς
- (20)εὐφράνθη ἡ καρδία μου ἐν αὐτῇ·
- ἐπέβη ὁ πούς μου ἐν εὐθύτητι,
- ἐκ νεότητός μου ἴχνευον αὐτήν.
- ἔκλινα ὀλίγον τὸ οὖς μου καὶ ἐδεξάμην.
- καὶ πολλὴν εὗρον ἐμαυτῷ παιδείαο·
- προκοπὴ ἐγένετό μοι ἐν αὐτῇ·
- (23)τῷ διδόντι μοι σοφίαν δώσω δόξαν.
- διενοήθην γὰρ τοῦ ποιῆσαι αὐτήν,
- καὶ ἐζήλωσα τὸ ἀγαθόν, καὶ οὐ μὴ αἰσχυνθῶ.