Ecclesiasticus sive Siracides (Sapientia Jesu filii Sirach)

Septuaginta

Septuaginta. The Old Testament in Greek According to the Septuagint. Volume 2: I Chronicles-Tobit. Swete, Henry Barclay, editor. Cambridge: Cambridge University Press, 1896.

  1. χάριν ἀδιαφόρου πολλοὶ ἥμαρτον,
  2. καὶ ὁ ζητῶν πληθῦναι ἀποστρέψει ὀφθαλμόν.
  1. ἀνὰ μέσον ἁρμῶν λίθων παγήσεται πάσσαλος,
  2. καὶ ἀνὰ μέσον πράσεως καὶ ἀγορασμοῦ συντριβήσεται
  3. ἁμαρτία.
  1. ἐὰν μὴ ἐν φόβῳ Κυρίου κρατήσῃ κατὰ σπουδήν,
  2. ἐν τάχει καταστραφήσεται αὐτοῦ ὁ οἶκος.
  1. ἐν σείσματι κοσκίνου διαμένει κοπρία,
  2. οὕτως σκύβαλα ἀνθρώπου ἐν λογισμῷ αὐτοῦ.
  1. σκεύη κεραμέως δοκιμάζει κάμινος,
  2. καὶ πειρασμὸς ἀνθρώπου ἐυ διαλογισμῷ αὐτοῦ.
  1. γεώργιον ξύλου ἐκφαίνει ὁ καρπὸς αὐτοῦ,
  2. οὕτως λόγος ἐνθυμήματος καρδίας ἀνθρώπου.
  1. πρὸ λογισμοῦ μὴ ἐπαινέσῃς ἄνδρα,
  2. οὗτος γὰρ πειρασμὸς ἀνθρώπων.
  1. ἐὰν διώκῃς τὸ δίκαιον, καταλήμψῃ,
  2. καὶ ἐνδύσῃ αὐτὸ ὡς ποδήρη δόξης.
  1. πετεινὰ πρὸς τὰ ὅμοια αὐτοῖς καταλύσει,
  2. καὶ ἀλήθεια πρὸς τοὺς ἐργαζομένους αὐτὴν ἐπανήξει.
  1. λέων θῆραν ἐνεδρεύει,
  2. οὕτως ἁμαρτίαι ἐργαζομένους ἄδικα.