Cynegetica
Oppian of Apamea
Oppian of Apamea. Cynegetica. Mair, A. W., editor. London, William Heinemann, Ltd.; New York: G.P. Putnam's Sons. 1928.
- δίκτυά τʼ ἀμπετάσαντο καὶ ἄρκυας ἀμφεβάλοντο·
- ἐν δὲ δύω κλῖναν δοιαῖς ἑκάτερθε κεραίαις
- ἀνέρας ἀκρολίνους ὑπὸ[*](ἐπὶ in lit. BK.) μειλινέοισι πάγοισιν.[*](πάγαισι B de Ballu.)
- ἐκ δʼ αὐτῶν κεράων τε καὶ αἰζηῶν πυλαωρῶν
- λαιῇ μὲν μήρινθον ἐΰστροφον ἐκτανύουσι
- μηκεδανήν, λινέην, ὀλίγον γαίης ἐφύπερθεν,
- ὅσσον ἐπʼ ὀμφαλὸν ἀνδρὸς ἱκανέμεναι στροφάλιγγα·
- τῆς ἀπὸ μὲν κρέμαται περιδαίδαλα παμφανόωντα
- ἄνθεα ταινιῶν πουλύχροα, δείματα θηρῶν,
- ἐκ δʼ ἄρʼ ἀπήρτηται πτίλα μυρία παμφανόωντα,
- οἰωνῶν τε διηερίων περικαλλέα ταρσὰ
- γυπάων πολιῶν τε κύκνων δολιχῶν τε πελαργῶν.
- δεξιτερῇ δὲ λόχους ὑπὸ ῥωγάσιν[*](ῥωπάσιν A3, in lit. M.) ἐστήσαντο,
- ἢ χλοεροῖς πετάλοισι θοῶς πυκάσαντο μέλαθρα,
- τυτθὸν ἀπʼ ἀλλήλων, πίσυρας δʼ ἐκάλυψαν ἑκάστῳ
- ἀνέρας, ὁρπήκεσσι πρόπαν δέμας ἀμφιβαλόντες.
- αὐτὰρ ἐπὴν κατὰ κόσμον ἐπαρτέα πάντα πέλωνται,
- σάλπιγξ μὲν κελάδησε πελώριον, ἡ δέ τε λόχμης
- ὀξὺ λέληκε θοροῦσα καὶ ὀξὺ δέδορκε λακοῦσα·
- αἰζηοὶ δʼ ἐπόρουσαν ἀολλέες, ἐκ δʼ ἑκάτερθεν