Frogs

Aristophanes

Aristophanes. Aristophanis Comoediae, Vol. 2. Hall, F. W. and Geldart, William M., editors. Oxford: Clarendon Press, 1907.

  1. ἐμοὶ δʼ ἄχεʼ ἄχεα κατέλιπε,
  2. δάκρυα δάκρυά τʼ ἀπʼ ὀμμάτων
  3. ἔβαλον ἔβαλον ἁ τλάμων.
  4. ἀλλʼ ὦ Κρῆτες, Ἴδας τέκνα,
  5. τὰ τόξα λαβόντες ἐπαμύνατε,
  6. τὰ κῶλά τʼ ἀμπάλλετε κυκλούμενοι τὴν οἰκίαν.
  7. ἅμα δὲ Δίκτυννα παῖς Ἄρτεμις καλὰ
  8. τὰς κυνίσκας ἔχουσʼ ἐλθέτω διὰ δόμων πανταχῇ,
  9. σὺ δʼ ὦ Διὸς διπύρους ἀνέχουσα
  10. λαμπάδας ὀξυτάτας χεροῖν Ἑκάτα παράφηνον
  11. ἐς Γλύκης, ὅπως ἂν
  12. εἰσελθοῦσα φωράσω.
Διόνυσος
  1. παύσασθον ἤδη τῶν μελῶν.
Αἰσχύλος
  1. κἄμοιγʼ ἅλις.
  2. ἐπὶ τὸν σταθμὸν γὰρ αὐτὸν ἀγαγεῖν βούλομαι,
  3. ὅπερ ἐξελέγξει τὴν ποίησιν νῷν μόνον.
  4. τὸ γὰρ βάρος νὼ βασανιεῖ τῶν ῥημάτων.
Διόνυσος
  1. ἴτε δεῦρό νυν, εἴπερ γε δεῖ καὶ τοῦτό με
  2. ἀνδρῶν ποιητῶν τυροπωλῆσαι τέχνην.
Χορός
  1. ἐπίπονοί γʼ οἱ δεξιοί.
  2. τόδε γὰρ ἕτερον αὖ τέρας
  3. νεοχμόν, ἀτοπίας πλέων,
  4. ὃ τίς ἂν ἐπενόησεν ἄλλος;
  5. ---
  6. μὰ τὸν ἐγὼ μὲν οὐδʼ ἂν εἴ τις
  7. ἔλεγέ μοι τῶν ἐπιτυχόντων,
  8. ἐπιθόμην, ἀλλʼ ᾠόμην ἂν
  9. αὐτὸν αὐτὰ ληρεῖν.
Διόνυσος
  1. ἴθι δὴ παρίστασθον παρὰ τὼ πλάστιγγʼ,
Αἰσχύλος καί Εὐριπίδης
  1. ἰδού.
Διόνυσος
  1. καὶ λαβομένω τὸ ῥῆμʼ ἑκάτερος εἴπατον,
  2. καὶ μὴ μεθῆσθον, πρὶν ἂν ἐγὼ σφῷν κοκκύσω.
Αἰσχύλος καὶ Εὐριπίδης
  1. ἐχόμεθα.
Διόνυσος
  1. τοὔπος νῦν λέγετον ἐς τὸν σταθμόν.
Εὐριπίδης
  1. εἴθʼ ὤφελʼ Ἀργοῦς μὴ διαπτάσθαι σκάφος.
Αἰσχύλος
  1. Σπερχειὲ ποταμὲ βουνόμοι τʼ ἐπιστροφαί.
Διόνυσος
  1. κόκκυ, μέθεσθε· καὶ πολύ γε κατωτέρω
  2. χωρεῖ τὸ τοῦδε.
Εὐριπίδης
  1. καὶ τί ποτʼ ἐστὶ ταἴτιον;
Διόνυσος
  1. ὅτι εἰσέθηκε ποταμόν, ἐριοπωλικῶς
  2. ὑγρὸν ποιήσας τοὔπος ὥσπερ τἄρια,
  3. σὺ δʼ εἰσέθηκας τοὔπος ἐπτερωμένον.
Εὐριπίδης
  1. ἀλλʼ ἕτερον εἰπάτω τι κἀντιστησάτω.