Odyssey

Homer

Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.

  1. ἦ τάχα Ἶρος Ἄϊρος ἐπίσπαστον κακὸν ἕξει,
  2. οἵην ἐκ ῥακέων ὁ γέρων ἐπιγουνίδα φαίνει.
  3. ὣς ἄρʼ ἔφαν, Ἴρῳ δὲ κακῶς ὠρίνετο θυμός.
  4. ἀλλὰ καὶ ὣς δρηστῆρες ἄγον ζώσαντες ἀνάγκῃ
  5. δειδιότα· σάρκες δὲ περιτρομέοντο μέλεσσιν.
  6. Ἀντίνοος δʼ ἐνένιπεν ἔπος τʼ ἔφατʼ ἔκ τʼ ὀνόμαζεν·
  7. νῦν μὲν μήτʼ εἴης, βουγάϊε, μήτε γένοιο,
  8. εἰ δὴ τοῦτόν γε τρομέεις καὶ δείδιας αἰνῶς,
  9. ἄνδρα γέροντα, δύῃ ἀρημένον, ἥ μιν ἱκάνει.