Odyssey

Homer

Homer. The Odyssey, Volume 1-2. Murray, A. T. (Augustus Taber), editor. London: William Heinmann; New York: G.P. Putnam's Sons, 1919.

  1. βῆ δʼ ἰθὺς μεγάροιο μετὰ μνηστῆρας ἀγαυούς.
  2. Ἄργον δʼ αὖ κατὰ μοῖρʼ ἔλαβεν μέλανος θανάτοιο,
  3. αὐτίκʼ ἰδόντʼ Ὀδυσῆα ἐεικοστῷ ἐνιαυτῷ.
  4. τὸν δὲ πολὺ πρῶτος ἴδε Τηλέμαχος θεοειδὴς
  5. ἐρχόμενον κατὰ δῶμα συβώτην, ὦκα δʼ ἔπειτα
  6. νεῦσʼ ἐπὶ οἷ καλέσας· ὁ δὲ παπτήνας ἕλε δίφρον
  7. κείμενον, ἔνθα τε δαιτρὸς ἐφίζεσκε κρέα πολλὰ
  8. δαιόμενος μνηστῆρσι δόμον κάτα δαινυμένοισι·
  9. τὸν κατέθηκε φέρων πρὸς Τηλεμάχοιο τράπεζαν
  10. ἀντίον, ἔνθα δʼ ἄρʼ αὐτὸς ἐφέζετο· τῷ δʼ ἄρα κῆρυξ
  11. μοῖραν ἑλὼν ἐτίθει κανέου τʼ ἐκ σῖτον ἀείρας.
  12. ἀγχίμολον δὲ μετʼ αὐτὸν ἐδύσετο δώματʼ Ὀδυσσεύς,
  13. πτωχῷ λευγαλέῳ ἐναλίγκιος ἠδὲ γέροντι,
  14. σκηπτόμενος· τὰ δὲ λυγρὰ περὶ χροΐ εἵματα ἕστο.
  15. ἷζε δʼ ἐπὶ μελίνου οὐδοῦ ἔντοσθε θυράων,
  16. κλινάμενος σταθμῷ κυπαρισσίνῳ, ὅν ποτε τέκτων
  17. ξέσσεν ἐπισταμένως καὶ ἐπὶ στάθμην ἴθυνεν.
  18. Τηλέμαχος δʼ ἐπὶ οἷ καλέσας προσέειπε συβώτην,
  19. ἄρτον τʼ οὖλον ἑλὼν περικαλλέος ἐκ κανέοιο
  20. καὶ κρέας, ὥς οἱ χεῖρες ἐχάνδανον ἀμφιβαλόντι·
  21. δὸς τῷ ξείνῳ ταῦτα φέρων αὐτόν τε κέλευε
  22. αἰτίζειν μάλα πάντας ἐποιχόμενον μνηστῆρας·
  23. αἰδὼς δʼ οὐκ ἀγαθὴ κεχρημένῳ ἀνδρὶ παρεῖναι.
  24. ὣς φάτο, βῆ δὲ συφορβός, ἐπεὶ τὸν μῦθον ἄκουσεν,
  25. ἀγχοῦ δʼ ἱστάμενος ἔπεα πτερόεντʼ ἀγόρευε·
  26. Τηλέμαχός τοι, ξεῖνε, διδοῖ τάδε, καί σε κελεύει
  27. αἰτίζειν μάλα πάντας ἐποιχόμενον μνηστῆρας·
  28. αἰδῶ δʼ οὐκ ἀγαθήν φησʼ ἔμμεναι ἀνδρὶ προΐκτῃ.
  29. τὸν δʼ ἀπαμειβόμενος προσέφη πολύμητις Ὀδυσσεύς·