Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- ἐσθλὰ μὲν ἐσθλὸς ἔδυνε, χέρεια δὲ χείρονι δόσκεν.
- αὐτὰρ ἐπεί ῥʼ ἕσσαντο περὶ χροῒ νώροπα χαλκὸν
- βάν ῥʼ ἴμεν· ἦρχε δʼ ἄρά σφι Ποσειδάων ἐνοσίχθων
- δεινὸν ἄορ τανύηκες ἔχων ἐν χειρὶ παχείῃ
- εἴκελον ἀστεροπῇ· τῷ δʼ οὐ θέμις ἐστὶ μιγῆναι
- ἐν δαῒ λευγαλέῃ, ἀλλὰ δέος ἰσχάνει ἄνδρας.
- Τρῶας δʼ αὖθʼ ἑτέρωθεν ἐκόσμει φαίδιμος Ἕκτωρ.
- δή ῥα τότʼ αἰνοτάτην ἔριδα πτολέμοιο τάνυσσαν
- κυανοχαῖτα Ποσειδάων καὶ φαίδιμος Ἕκτωρ,
- ἤτοι ὃ μὲν Τρώεσσιν, ὃ δʼ Ἀργείοισιν ἀρήγων.
- ἐκλύσθη δὲ θάλασσα ποτὶ κλισίας τε νέας τε
- Ἀργείων· οἳ δὲ ξύνισαν μεγάλῳ ἀλαλητῷ.
- οὔτε θαλάσσης κῦμα τόσον βοάᾳ ποτὶ χέρσον
- ποντόθεν ὀρνύμενον πνοιῇ Βορέω ἀλεγεινῇ·
- οὔτε πυρὸς τόσσός γε ποτὶ βρόμος αἰθομένοιο
- οὔρεος ἐν βήσσῃς, ὅτε τʼ ὤρετο καιέμεν ὕλην·
- οὔτʼ ἄνεμος τόσσόν γε περὶ δρυσὶν ὑψικόμοισι
- ἠπύει, ὅς τε μάλιστα μέγα βρέμεται χαλεπαίνων,
- ὅσση ἄρα Τρώων καὶ Ἀχαιῶν ἔπλετο φωνὴ
- δεινὸν ἀϋσάντων, ὅτʼ ἐπʼ ἀλλήλοισιν ὄρουσαν.