Antigone
Sophocles
Sophocles, Volume 1. Storr, Francis, editor. London; New York: William Heinemann Ltd.; The Macmillan Company, 1912.
- χώσουσʼ ἀδελφῷ φιλτάτῳ πορεύσομαι.
- οἴμοι ταλαίνης, ὡς ὑπερδέδοικά σου.
- μὴ ʼμοῦ προτάρβει· τὸν σὸν ἐξόρθου πότμον.
- ἀλλʼ οὖν προμηνύσῃς γε τοῦτο μηδενὶ
- τοὔργον, κρυφῇ δὲ κεῦθε, σὺν δʼ αὔτως ἐγώ.
- οἴμοι, καταύδα· πολλὸν ἐχθίων ἔσει
- σιγῶσʼ, ἐὰν μὴ πᾶσι κηρύξῃς τάδε.
- θερμὴν ἐπὶ ψυχροῖσι καρδίαν ἔχεις.
- ἀλλʼ οἶδʼ ἀρέσκουσʼ οἷς μάλισθʼ ἁδεῖν με χρή.
- εἰ καὶ δυνήσει γʼ· ἀλλʼ ἀμηχάνων ἐρᾷς.
- οὐκοῦν, ὅταν δὴ μὴ σθένω, πεπαύσομαι.
- ἀρχὴν δὲ θηρᾶν οὐ πρέπει τἀμήχανα.
- εἰ ταῦτα λέξεις, ἐχθαρεῖ μὲν ἐξ ἐμοῦ,
- ἐχθρὰ δὲ τῷ θανόντι προσκείσει δίκῃ.
- ἀλλʼ ἔα με καὶ τὴν ἐξ ἐμοῦ δυσβουλίαν
- παθεῖν τὸ δεινὸν τοῦτο· πείσομαι γὰρ οὐ
- τοσοῦτον οὐδὲν ὥστε μὴ οὐ καλῶς θανεῖν.
- ἀλλʼ εἰ δοκεῖ σοι, στεῖχε· τοῦτο δʼ ἴσθʼ ὅτι
- ἄνους μὲν ἔρχει, τοῖς φίλοις δʼ ὀρθῶς φίλη.
- ἀκτὶς ἀελίου, τὸ κάλλιστον ἑπταπύλῳ φανὲν