The Phoenician Women
Euripides
Euripides. Euripidis Fabulae, Vol. III. Murray, Gilbert, editor. Oxford: Clarendon Press, 1913. (Reprinted 1920-1978)
- βούλῃ παρόντος δῆτά σοι τούτου φράσω;
- κλύων γὰρ ἂν τέρποιτο τῆς σωτηρίας.
- ἄκουε δή νυν θεσφάτων ἐμῶν ὁδόν·
- ἃ δρῶντες ἂν σώσαιτε Καδμείων πόλιν
- σφάξαι Μενοικέα τόνδε δεῖ σʼ ὑπὲρ πάτρας,
- σὸν παῖδʼ, ἐπειδὴ τὴν τύχην αὐτὸς καλεῖς.
- τί φῄς; τίνʼ εἶπας τόνδε μῦθον, ὦ γέρον;
- ἅπερ πέφυκε, ταῦτα κἀνάγκη σὲ δρᾶν.
- ὦ πολλὰ λέξας ἐν βραχεῖ χρόνῳ κακά.
- σοί γʼ, ἀλλὰ πατρίδι μεγάλα καὶ σωτήρια.
- οὐκ ἔκλυον, οὐκ ἤκουσα· χαιρέτω πόλις.
- ἁνὴρ ὅδʼ οὐκέθʼ αὑτός· ἐκνεύει πάλιν.
- χαίρων ἴθʼ· οὐ γὰρ σῶν με δεῖ μαντευμάτων.
- ἀπόλωλεν ἡ ἀλήθειʼ, ἐπεὶ σὺ δυστυχεῖς;
- ὦ πρός σε γονάτων καὶ γερασμίου τριχὸς —
- τί προσπίτνεις με; δυσφύλακτʼ αἰτῇ κακά.
- σίγα· πόλει δὲ τούσδε μὴ λέξῃς λόγους.
- ἀδικεῖν κελεύεις μʼ· οὐ σιωπήσαιμεν ἄν.
- τί δή με δράσεις; παῖδά μου κατακτενεῖς;
- ἄλλοις μελήσει ταῦτʼ, ἐμοὶ δʼ εἰρήσεται.