Electra
Euripides
Euripides. Euripidis Fabulae, Vol. II. Murray, Gilbert, editor. Oxford: Clarendon Press, 1913. (Reprinted 1921-1962)
- Αἴγισθον εἶδον, ἡνίχʼ εἷρπον ἐνθάδε.
- προσηκάμην τὸ ῥηθέν. ἐν ποίοις τόποις;
- ἀγρῶν πέλας τῶνδʼ ἱπποφορβίων ἔπι.
- τί δρῶνθʼ; ὁρῶ γὰρ ἐλπίδʼ ἐξ ἀμηχάνων.
- Νύμφαις ἐπόρσυνʼ ἔροτιν, ὡς ἔδοξέ μοι.
- τροφεῖα παίδων ἢ πρὸ μέλλοντος τόκου;
- οὐκ οἶδα πλὴν ἕν· βουσφαγεῖν ὡπλίζετο.
- πόσων μετʼ ἀνδρῶν; ἢ μόνος δμώων μέτα;
- οὐδεὶς παρῆν Ἀργεῖος, οἰκεία δὲ χείρ.
- οὔ πού τις ὅστις γνωριεῖ μʼ ἰδών, γέρον;
- δμῶες μέν εἰσιν, οἳ σέ γʼ οὐκ εἶδόν ποτε.
- ἡμῖν ἂν εἶεν, εἰ κρατοῖμεν, εὐμενεῖς;
- δούλων γὰρ ἴδιον τοῦτο, σοὶ δὲ σύμφορον.
- πῶς οὖν ἂν αὐτῷ πλησιασθείην ποτέ;