Fall of Troy
Quintus Smyrnaeus
Quintus Smyrnaeus. Fall of Troy. Way, Arthur S., editor. London: W. Heinemann; New York: The Macmillan Co., 1913.
- αἰπυτάτων ὀρέων, ἥ τʼ ἄγκεα πολλὰ παλύνει
- χευαμένη ζεφύροιο καταιγίσιν· ἡ δʼ ἄρʼ ὑπʼ Εὔρῳ
- ἠελίῳ τε χιὼν κατατήκεται ἀμφὶ δὲ μακραὶ
- ἄκριες ὑδρηλῇσι κατειβόμεναι λιβάδεσσι
- δεύονθʼ, ἡ δὲ νάπῃσιν ἀπειρεσίη περ ἐοῦσα
- πίδακος ἐσσυμένης κρυερὸν περιτήκεται ὕδωρ·
- ὣς ἥ γʼ ἀσχαλόωσα μέγα στυγερῇ ὑπʼ ἀνίῃ
- τήκετʼ ἀκηχεμένη πόσιος περὶ κουριδίοιο.
- αἰνὰ δʼ ἀναστενάχουσα φίλον προσελέξατο θυμόν·
- ὤ μοι ἀτασθαλίης, ὤ μοι στυγεροῦ βιότοιο,
- ἣ πόσιν ἀμφαγάπησα δυσάμμορον, ᾧ σὺν ἐώλπειν
- γήραϊ τειρομένη βιότου κλυτὸν οὐδὸν ἱκέσθαι
- αἰὲν ὁμοφρονέουσα· θεοὶ δʼ ἑτέρωσε βάλοντο·
- ὥς μʼ ὄφελόν ποτε Κῆρες ἀνηρείψαντο μέλαιναι,
- ὁππότε νόσφιν ἔμελλον Ἀλεξάνδροιο πέλεσθαι·
- ἀλλὰ καὶ εἰ ζωός μʼ ἔλιπεν, μέγα τλήσομαι ἔργον
- ἀμφʼ αὐτῷ θανέειν, ἐπεὶ οὔτι μοι εὔαδεν ἠώς.
- ὣς φαμένης ἐλεεινὰ κατὰ βλεφάροιιν ἔχυντο
- δάκρυα, κουριδίοιο δʼ ἀναπλήσαντος ὄλεθρον
- μνωομένη, ἅτε κηρὸς ὑπαὶ πυρί, τήκετο λάθρῃ,