Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- Λητῴη φυγόδεμνε, κυνοσσόε, σύγγονε Φοίβου,
- οὐ μὲν ἐμῷ δρεπάνῳ Τιτηνίδα παῖδα δαμάσσω,
- οὐδέ μιν ἐν Φρυγίῃ τελέσω πετρώδεα νύμφην,
- Τιτήνων γεγαυῖα παλαίτατον αἷμα καὶ αὐτή,
- μή ποτέ μοι μέμψαιτο πατὴρ Λήλαντος ἀκούων·
- ἓν δέ σοι, ἰοχέαιρα, χαρίζομαι· ἀγρότις Αὔρη
- παρθενικὴν ἤλεγξε, καὶ οὐκέτι παρθένος ἔσται·
- καί μιν ἐσαθρήσειας ὀρεσσιχύτου διὰ κόλπου
- δάκρυσι πηγαίοισιν ὀδυρομένην ἔτι μίτρην.
- εἶπε παρηγορέουσα· καὶ οὔρεα κάλλιπε κούρη
- Ἄρτεμις ἑζομένη κεμάδων τετράζυγι δίφρῳ,
- καὶ Φρυγίης ἐπέβαινεν. ὁμοζήλῳ πορείῃ
- παρθένος Ἀδρήστεια μετήιε δύσμαχον Αὔρην,
- γρῦπας ἁμιλλητῆρας ὑποζεύξασα χαλινῷ·
- καὶ ταχινὴ πεφόρητο διʼ ἠέρος ὀξέι δίφρῳ,
- καὶ δρόμον ἐστήριξεν ὑπὲρ Σιπύλοιο καρήνων
- Τανταλίδος προπάροιθε λιθογλήνοιο προσώπου,
- πτηνῶν τετραπόδων σκολιοὺς σφίγγουσα χαλινούς.
- αὔρης δʼ ἐγγὺς ἵκανεν ἀγήνορος· ὑψίνοον δὲ
- αὐχένα δειλαίης ὀφιώδεϊ τύψεν ἱμάσθλῃ,