Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- σώζεο καὶ σύ, φίλη παιδοκτόνε μῆτερ Ἀγαύη.
- δέρκεο ταῦτα γένεια νεότριχα, δέρκεο μορφὴν
- ἀνδρομέην· οὐκ εἰμὶ λέων· οὐ θῆρα δοκεύεις.
- φείδεο σῆς ὠδῖνος, ἀμείλιχε, φείδεο μαζῶν·
- Πενθέα παπταίνεις με, τὸν ἔτρεφες. ἴσχεο, φωνή,
- μύθους σεῖο φύλαξον· ἀνήκοός ἐστιν Ἀγαύη.
- εἰ δὲ κατακτείνεις με χαριζομένη Διονύσῳ,
- μούνη παῖδα δάμασσον, ἀγάστονε, μηδὲ δαμῆναι
- Βασσαρίδων τεὸν υἷα νόθαις παλάμῃσιν ἐάσῃς.
- ὣς φάμενος λιτάνευε, καὶ οὐκ ἤκουσεν Ἀγαύη.
- ἀμφὶ δέ μιν δασπλῆτες ἐπερρώοντο γυναῖκες
- χερσὶν ὁμοζήλοισι· κυλινδομένου δὲ κονίῃ
- ἡ μέν ὀπισθιδίους πόδας εἴρυσεν, ἡ δὲ λαβοῦσα
- δεξιτερὴν προθέλυμνον ἀνέσπασεν, Αὐτονόη δὲ
- λαιὴν ἀντερύεσκε· παραπλαγχθεῖσα δὲ μήτηρ
- στήθεϊ παιδὸς ἔπηξεν ἑὸν πόδα, κεκλιμένου δὲ
- αὐχένα τολμήεντα διέθρισεν ὀξέι θύρσῳ·
- καὶ φονίῳ ταχύγουνος ἀνέδραμε χάρματι λύσσης,
- αἱματόεν δὲ κάρηνον ἀτερπέι δείκνυε Κάδμῳ·
- ψευδομένου δὲ λέοντος ἀγαλλομένη χάριν ἄγρης