Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- Ζηνὶ καὶ Ἁδρυάδεσσι μίαν ξύνωσε θυηλὴν
- Κάδμος Ἀγηνορίδης, θεοτερπέα βωμὸν ἀνάψας,
- ῥέζων ἀμφοτέροισιν· ἀναπτομένοιο δὲ πυρσοῦ
- κνίση μὲν περίφοιτος ἕλιξ συνενήχετο καπνῷ
- εὐόδμῳ στροφάλιγγι, δαϊζομένου δʼ ἄρα ταύρου
- ὄρθιος αἱμαλέης αὐτόσσυτος αὐλὸς ἐέρσης
- χεῖρας ἐρευθιόωντι φόνῳ πόρφυρεν Ἀγαύης ---
- αὐχένιον δὲ τένοντα πέριξ στεφανηδὸν ἑλίξας
- οἰδαλέην ἐπίκυρτον ἑὴν δοχμώσατο δειρὴν
- μείλιχος εἱλικόεντι δράκων μιτρούμενος ὁλκῷ,
- στέμματι δʼ ὁλκαίῳ κεφαλὴν κυκλώσατο Κάδμου
- πρηῢς ὄφις, καὶ γλῶσσα πέριξ λίχμαζεν ὑπήνην
- μειλιχίων φίλον ἰὸν ἀποπτύουσα γενείων
- οἰγομένων· καὶ θῆλυς ὄφις μιτρώσατο κόρσην
- Ἁρμονίης ξανθοῖσι περιπλεχθεῖσα κορύμβοις.
- καὶ διδύμων ὀφίων πετρώσατο γυῖα Κρονίων,
- ὅττι παρʼ Ἰλλυρικοῖο δρακοντοβότου στόμα πόντου
- Ἁρμονίη καὶ Κάδμος ἀμειβομένοιο προσώπου
- λαϊνέην ἤμελλον ἔχειν ὀφιώδεα μορφήν.
- καὶ φόβον ἄλλον ἔχουσα μετὰ προτέρου φόβον ὕπνου