Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- πασάων προφέρουσα φαείνεται, οἷα καὶ αὐτὴ
- φαιδροτέραις ἀκτῖσι κατακρύπτει σέλας ἄστρων
- μαρμαρυγὴν εὔκυκλον ἀκοντίζουσα Σελήνη.
- καὶ διδύμοις βελέεσσι κορύσσεται εἰν ἑνὶ θεσμῷ,
- κάλλεϊ τοξεύουσα καὶ αἰχμάζουσα σιδήρῳ·
- ἔστι δὲ Πασιθέη κορυθαιόλος, ἥν τινα Βάκχαι
- Χαλκομέδην καλέουσιν· ἐγὼ δέ μιν αὐτὸς ἐνίψω
- Ἄρτεμιν ἀργυρόπεζαν ἠὲ [*](So MSS.) χρύσασπιν Ἀθήνην.
- ὥς φάμενος σίγησε· καὶ ὀφρύος ἄκρα καθέλκων
- αἰδομένοις στομάτεσσι δυσίμερος ἔννεπε Μορρεύς·
- ἀτρεκέως Διόνυσος ἐδύσατο κῦμα θαλάσσης
- δειμαίνων Λυκόοργον, ὑποβρυχίοιο δὲ κόλπου
- Νηρεΐδας θώρηξε, καὶ ἐξ ἁλὸς ἦλθε κομίζων
- εἰναλίην ἐς Ἄρηα κασιγνήτην Ἀφροδίτην·
- ἀντὶ δὲ νυμφιδίοιο καὶ εὐόδμοιο χιτῶνος
- δῶκεν ἔχειν θώρηκα σιδήρεον, ἀντὶ κεστοῦ
- χάλκεον ἔγχος ὄπασσε· καὶ οὔνομα τὸ πρὶν ἀμείψας
- Χαλκομέδην ὀνόμηνε κορυσσομένην Ἀφροδίτην·
- ἔστι δὲ Βασσαρίδεσσι συνέμπορος· ἀμφοτέροις δὲ
- μάρναμαι ἀγνώσσων, καὶ Κύπριδι καὶ Διονύσῳ.