Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- λυσίπονον δόλον ἄλλον ἀοσσητῆρα τοκῆος.
- ἤθελον ἆορ ἐκεῖνο μιαιφόνον, ὄφρα δαμείην
- πατροφόνῳ βαρύθυμος ὀλισθήσασα σιδήρῳ.
- οὗτος, ὃς ἡμετέρου κεφαλὴν ἔτμηξε τοκῆος,
- κτεῖνε καὶ Ἠερίην μετὰ Τέκταφον, ὄφρά τις εἴπῃ·
- καὶ γενέτην καὶ παῖδα μιῇ πρήνιξε μαχαίρῃ.
- Ἕννεπε δακρυχέουσα· πόνος δʼ ἠέξετο μείζων.
- καὶ διδύμαις στρατιῇσιν ἐπερρίπιζεν Ἐνυώ ---
- Ταιναρίδην δʼ ἔκτεινε Δασύλλιον ἄορι Μορρεύς,
- μή ποτε δυσμενέεσσιν ἀπορρίψαντα βοείην,
- ἀντιβίοις ἀτίνακτον Ἀμυκλαῖον πολιήτην,
- γναθμοῦ δεξιτεροῖο παρʼ ὀστέον ἔγχος ἐρείσας.
- ἔκτανε δʼ Ἀλκιμάχειαν ὀρίδρομον, εἰν ἑνὶ θεσμῷ
- ἠνορέην καὶ κάλλος ὑπέρτερον ἥλικος ἥβης,
- κούρην Ἁρπαλίωνος ἐρισταφύλοιο τοκῆος,
- ἣ πέλε τολμήεσσα καὶ εἰς δόμον ἤλυθεν Ἥρης
- κισσὸν ἀερτάζουσα, τὸν Ἀργολὶς ἔστυγε δαίμων,
- ὅσσον ἐρευθιόωσαν ἐθήμονα φίλατο ῥοιήν·
- καὶ βρέτας εὐποίητον ἐμάστιεν οἵνοπι θύρσῳ,
- χάλκεον ἀμπελόεντι δέμας πλήσσουσα κορύμβῳ,