Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- ὁππότε κουφίζων παλάμας ὑπὲρ ἄντυγα μαζοῦ [*](MSS. and Ludwich μηροῦ: μαζοῦ H. J. R., cf. xxii. 328. )
- Ζηνὶ τεῷ πολέμιζεν, ἐν ἠερίῃ δὲ κελεύθῳ
- στοιχάδας ὑψιλόφῳ νεφέλας ἔστησε καρήνῳ,
- καὶ σκολιαῖς ὄρνιθας ἐπιπλαγχθέντας ἐθείραις
- πολλάκι συμμάρψας πολυχανδέι δαίνυτο λαιμῷ·
- τοῦτον ἀριστεύοντα τεὸς κτάνε σύγγονος Ἄρης.
- Αρεος οὐ καλέω σε χερείονα· καὶ γὰρ ἐρίζοις
- πᾶσι Διὸς τεκέεσσιν, ἐπεὶ φονίῳ σέο θύρσῳ
- τόσσον ἀριστεύεις, ὅσσον δορὶ μάρναται Ἄρης,
- καὶ τελέεις, ἅτε Φοῖβος, ἀέθλια, θηροφόνον δὲ
- υἱὸν ἐγὼ Διὸς ἄλλον ἐμῷ ξείνισσα μελάθρῳ·
- χθιζὰ γὰρ εἰς ἐμὸν οἶκον ἐύπτερος ἤλυθε Περσεὺς
- γείτονα Κωρυκίοιο διαυγέα Κύδνον ἐάσας,
- ὡς σύ, φίλος, καὶ ἔφασκεν ἐπώνυμον ὠκέι ταρσῷ
- ἀνδράσι πὰρ Κιλίκεσσι νεόκτιτον ἄστυ χαράξαι·
- ἀλλʼ ὁ μὲν ἠέρταζεν ἀθηήτοιο. Μεδούσης
- Γοργόνος ἄκρα κάρηνα σὺ δʼ οἴνοπα καρπὸν ἀείρεις,
- ἄγγελον εὐφροσύνης, βροτέης ἐπίληθον ἀνίης·
- Περσεὺς κῆτος ἔπεφνεν Ἐρυθραίῳ παρὰ πόντῳ,
- καὶ σὺ κατεπρήνιξας Ἐρυθραίων γένος Ἰνδῶν.