Dionysiaca
Nonnus of Panopolis
Nonnus of Panopolis. Dionysiaca, Vol. 1-3. Rouse, W.H.D., editor. London: W. Heinemann Ltd.; Cambridge, MA, 1940-1942.
- καὶ χαροπῆς Κορύβαντες ἐποίπνυον ἀγχόθι φάτνης
- αὐχένα πορδαλίων ζυγίῳ δήσαντες ἱμάντι,
- κισσοδέτοις δὲ λέοντας ἐπιστώσαντο λεπάδνοις
- χεῖλος ἐπισφίγξαντες ἀπειλητῆρι χαλινῷ.
- καὶ λασίην Κένταυρος ἔχων φρίσσουσαν ὑπήνην
- εἰς ζυγὸν αὐτοκέλευστος ἑκούσιον αὐχένα τείνας ---
- [*](Ludwich marks a lacuna: Lobeck supplies χερσὶν ὀπισθοτόνοισιν ἐύτροχον εἷλκον ἀπήνην.) καὶ Σατύρων πολὺ μᾶλλον ἔχων πόθον ἡδέος οἴνου
- ἡμιτελὴς χρεμέτιζεν ἀνὴρ κεκερασμένος ἵππῳ,
- ἱέμενος Διόνυσον ἑοῖς ὤμοισιν ἀείρειν.
- καὶ θεὸς εὐόρπηκος ἐφήμενος ἄντυγι δίφρου
- Σαγγαρίου παρὰ χεῦμα, περὶ Φρύγα κόλπον ἀρούρης,
- λαϊνέης Νιόβης παρεμέτρεε πενθάδα πέτρην·
- καὶ λίθος Ἰνδὸν ὅμιλον ἐριδμαίνοντα Λυαίῳ
- δακρυόεις ὁρόων βροτέην πάλιν ἴαχε φωνήν·
- Μὴ μόθον ἐντύνητε θεημάχον, ἄφρονες Ἰνδοί,
- παιδὶ Διός, μὴ Βάκχος ἀπειλείοντας Ἐνυὼ
- λαϊνέους τελέσειε καὶ ὑμέας, ὥς περ Ἀπόλλων,
- μυρομένους τύπον ἶσον ἐμῇ πετρώδεϊ μορφῇ,
- μὴ ποταμοῦ παρὰ χεῦμα φερώνυμον Ἰνδὸν Ὀρόντην
- γαμβρὸν ἐσαθρήσητε δεδουπότα Δηριαδῆος.