Halieutica
Oppian
Oppian. Halieutica. Mair, A. W., editor. London, William Heinemann, Ltd.; New York: G.P. Putnam's Sons. 1928.
- οὐρὴν ἡγήτειραν ὑπὸ στόμα δεσμὸν ἔχοντα.
- πολλάκι δὲ προβαλόντος ἑὴν ἔντοσθεν ἁλόντος
- οὐρὴν ἄλλος ἔμαρψε καὶ ἐξείρυσσε θύραζε
- ἑσπόμενον· τοιοῖσδε νοήμασι πότμον ἄλυξαν.
- ὡς δʼ ὅτε παιπαλόεσσαν ἀναστείχωσι κολώνην
- φῶτες ὑπὸ σκιερῆς νυκτὸς κνέφας, ἡνίκα μήνη
- κέκρυπται, νεφέων δὲ κελαινιόωσι καλύπτραι,
- οἱ δʼ ὄρφνῃ μογέουσι καὶ ἀτρίπτοισι κελεύθοις
- πλαζόμενοι, χεῖράς τε μετʼ ἀλλήλοισιν ἔχουσιν,
- ἑλκόμενοί θʼ ἕλκουσι, πόνων ἐπίκουρον ἀμοιβήν·
- ὣς οἵ γʼ ἀλλήλοισιν ἀμοιβαίῃ φιλότητι
- ἀλκτῆρες γεγάασι· τὸ δέ σφισι μήσατʼ ὄλεθρον
- δειλαίοις, ὀλοοῦ δὲ καὶ ἀλγινόεντος ἔρωτος
- ἠντίασαν, βλαφθέντες ἐπιφροσύναις ἁλιήων.
- τέσσαρες ἐμβεβάασι θοὸν σκάφος ἀγρευτῆρες,
- τῶν ἤτοι δοιοὶ μὲν ἐπηρέτμοισι πόνοισι
- μέμβλονται, τρίτατος δὲ δολόφρονα μῆτιν ὑφαίνει.
- θῆλυν ἀναψάμενος σύρει σκάρον ἀκροτάτοιο
- χείλεος ἐν δίνῃσι λινοζεύκτῳ ὑπὸ δεσμῷ·
- ζωὴν μὲν κέρδιστον ἀνελκέμεν· ἢν δὲ θάνῃσι,