Halieutica
Oppian
Oppian. Halieutica. Mair, A. W., editor. London, William Heinemann, Ltd.; New York: G.P. Putnam's Sons. 1928.
- πυροδόκος στεφάνη λευκαίνεται ἔνδον ἀλωῆς·
- ὣς τότʼ ἀπειρεσίῃσι περιπληθὴς ἀφύῃσιν
- ὀφρὺς ἀγχιάλου λευκαίνεται αἰγιαλοῖο.
- φῦλα δὲ πηλαμύδων ἐκ μὲν γένος εἰσὶ θαλάσσης
- Εὐξείνου, θύννης δὲ βαρύφρονος εἰλείθυιαι·
- κεῖναι γάρ, Μαιῶτις ὅπῃ ξυμβάλλεται ἅλμῃ,
- ἀγρόμεναι λιμναῖον ὑπὸ στόμα καὶ δονακῆας
- ὑδρηλοὺς ὠδῖνος ἐπαλγέος ἐμνήσαντο·
- καὶ τὰ μὲν ὅσσα κίχωσι μεταδρομάδην κατέδουσιν
- ὠά, τὰ δʼ ἐν δονάκεσσι καὶ ἐν σχοίνοισι μένοντα
- πηλαμύδων ἀγέλας ὥρῃ τέκεν· αἱ δʼ ὅτε κῦμα
- πρῶτον ἐπιψαίρωσι πόροιο τε πειρήσωνται,
- ξεῖνον ἁλὸς σπεύδουσι μετὰ πλόον, οὐδʼ ἐθέλουσι
- μίμνειν ἔνθʼ ἐγένοντο καὶ ἠβαιαί περ ἐοῦσαι.
- Θρηΐκιος δέ τίς ἐστιν ἁλὸς πόρος, ὅντε βάθιστον
- φασὶ Ποσειδάωνος ἐνὶ κλήροισι τετύχθαι·
- ἐκ τοῦ καί τε Μέλας κικλήσκεται, οὐδέ ἑ λάβροι
- λίην οὐδʼ ὑπέροπλοι ἐπιθρώσκουσιν ἀῆται·
- ἐν δʼ ἄρα οἱ κευθμῶνες ὑποβρύχιοι πεφύασι
- κοῖλοι, πηλώεντες, ἀθέσφατοι, οἷς ἔνι πολλὰ